有日小妹經過中環威靈頓街,行到攰攰哋就發現呢間設計簡約嘅小店,本來以為只係售賣普通嘅健康食品,卻意外發現佢售賣時下最Hit嘅冷壓果汁! 門口設計簡約 冷壓果汁呢個名詞對於小妹嚟講真係識條鐵,究竟佢係點冷壓呢?係雪凍啲生果之後壓啲果汁出嚟,定係壓啲果汁出嚟再雪凍呢?佢同普通用攪絆機攪出嚟嘅果汁又有咩唔同呢?呢啲問題驅使我要入店一看究竟! 小店空間感大,方便客人選購產品 健康食品係另一個賣點 雪櫃放滿果汁同沙律 Afternoon Delight($65),成份有梨、士多啤梨同紅蘋果。 凍櫃入面嘅果汁有好多種類,而每一種都唔係單一嘅水果汁或蔬菜汁,大多都係蔬果混合式,通常味道較寡嘅蔬果都會溝一至兩種味道較甜嘅蔬果,或者咁樣可以令飲用者冇咁寡、易入口。店員會畀客人試味,睇吓邊種味道較討好。個人對於「青BB」嘅冷壓果汁有啲抗拒,硬係覺得好似鬼口水,所以試咗少少就耍手擰頭,最後都係揀咗Afternoon Delight($65),雖然成份簡單,只有梨、士多啤梨同紅蘋果,但味道微甜易入口,梨同蘋果嘅味道較重,反而士多啤梨味道飲輕,落似冇酒精嘅雞尾酒,但感覺比雞尾酒健康得多。 時下有啲女士會以斷食法加飲冷壓果汁減肥,連續幾日唔食嘢,每日剩係飲6至8枝呢啲果汁,雖然小妹唔知係咪真係有效,但感覺一枝以$60起跳嘅果汁真係有啲貴,間唔中飲吓扮吓中產就OK,要我幾日都咁飲,我未瘦身,銀行戶口都瘦咗一大截啦! 門口有梳化畀客人坐,又幾貼心。 另一邊有張藤椅,適合「等一個人的果汁」。 後記:冷壓果汁(Cold Pressed Juice)呢個Terms,係嚟自歐美掀起嘅一股養生風潮,意思係喺唔破壞同流失蔬果營養嘅原則下,運用適當嘅壓力粹取蔬果成汁,一般會用高壓機將蔬果壓成汁,確保當中嘅營養冇流失,因為用一般攪拌機攪果汁會產生熱力,破壞入面嘅維他命同營養,所以用冷壓嘅技術更能夠保存蔬果原本嘅營養價值,但由於冷壓果汁唔會用高溫消毒,所以要冷藏保持新鮮度。 店名: Catch Juicery 電話:2567 3677 地址:中環威靈頓街67號地舖