講到Afternoon Tea,女士定必瘋狂尖叫,皆因高貴華麗嘅三層架、精緻玲瓏嘅英式糕點同入口香醇嘅香檳都足以溶化女士嘅心,如果唔係英國貴族貝德芙公爵夫人無所事事又突然肚餓,相信呢種咁高貴嘅玩意一定唔會流行當道,當然,下午茶早已進化到N.0嘅階段,唔再係單一嘅三文治同英式鬆餅,而係創意同浪漫嘅呈現! 最近帝京酒店趁住「愛的季節」,特別同 Benefit Cosmetics合作推出下午茶,以粉紅色為主題,推出各款以Benefit化妝品為靈感嘅精緻甜點,令女士喺享用下午茶嘅同時,亦恍如享受緊化妝嘅樂趣,幻化成高貴美麗嘅甜蜜女王!而小妹亦趁情人節一嚐甜蜜滋味,過一個浪漫嘅情人節! 三層架下午茶以高貴浪漫為主,要變女皇So Easy!HK$508 /兩名客人(包兩杯特飲,另收加一服務費) 下午茶以傳統三層架呈現,另配上一碟兩件嘅英式提子鬆餅,鬆餅配有Clotted Cream 同玫瑰士多啤梨果醬。傳統嘅英式鬆餅配上具玫瑰花香氣嘅果醬,香甜醉人,為下午茶打開一個咗一個浪漫嘅Opening。 英式提子鬆餅配Clotted Cream 及玫瑰士多啤梨果醬 架嘅下層主要係鹹點,有牛油果酥皮、煙三文魚迷你麥包、炸奇趣去骨雞翼同炸龍蝦丸。個人覺得牛油果酥較特別,嚟自紐西蘭嘅牛油果混合檸檬汁、蕃茄同彩椒,配上三層酥皮,牛油果醬濃郁幼滑,酥皮香脆,口感極富層次。而炸奇趣去骨雞翼同韓式炸雞相似,下層總體有少少Fusion,都幾有新鮮感。 下層主要係鹹點,有牛油果酥皮、煙三文魚迷你麥包、炸奇趣去骨雞翼同炸龍蝦丸 中層鹹、甜點參半,包括青瓜蟹肉沙律、薄荷白朱古力慕絲、開心果草莓慕絲蛋糕、羊奶芝士多士同開心果櫻桃撻。 中層鹹、甜點參半,包括青瓜蟹肉沙律、薄荷白朱古力慕絲、開心果草莓慕絲蛋糕、羊奶芝士多士同開心果櫻桃撻 其中開心果草莓慕絲蛋糕嘅靈感係來自Benefit 輕柔淡雅嘅化妝品—— 蒲公英胭脂蜜粉,底層係混和咗日本杏仁粉同伊朗開心果嘅蛋白蛋糕,口感結實,中層係軟滑嘅草莓慕絲,頂層鋪上印有蒲公英圖案嘅糖膠,三層層次分明,口感豐富。 開心果草莓慕絲蛋糕 而薄荷白朱古力慕絲選配法國頂級Valrhona白朱古力,慕絲加入新鮮薄荷葉,入口清新細滑,朱古力碎同薄荷忌廉可提升慕絲嘅質感,再配上印有「HAHA」字樣嘅糖膠,女皇愈食愈開心! 薄荷白朱古力慕絲 至於開心果櫻桃撻,經過酒漬嘅櫻桃唔太甜膩,酒味香醇易入口,如果食咗前面兩款覺得太甜,食呢款可以話係Take a Break! 開心果櫻桃撻 不過個人唔太鍾意羊奶芝士多士,因為味道太羶,搶咗其他甜品唔少味。 至於上層完全係甜點,亦算係成個下午茶嘅主打,包括玫瑰粉紅香檳果凍、棉花糖伴草莓白朱古力唇膏、血桃泡芙及草莓白朱古力波板糖。玫瑰粉紅香檳果凍嘅靈感都係來自Benefit嘅皇牌產品——唇頰兩用嘅胭脂水Benetint,其經典嘅玫瑰色澤令唔少女士沉醉。酒店餅廚用大馬士革玫瑰精華同香檳製成啫喱,啫喱入面藏有一粒新鮮嘅美國紅桑子,集酒香、果香、花香於一身! 上層甜點包括玫瑰粉紅香檳果凍、棉花糖伴草莓白朱古力唇膏、血桃泡芙及草莓白朱古力波板糖 玫瑰粉紅香檳果凍 棉花糖伴草莓白朱古力唇膏極具創意,皆因佢將唇膏嘅概念放入甜品中!酒店餅廚將混合咗食用銀粉嘅草莓白朱古力注入唇膏樽仔入面,打造出閃亮效果,十足十真嘅唇彩!客人將棉花糖點草莓白朱古力醬食,唔講仲以為真係食緊唇膏! 棉花糖伴草莓白朱古力唇膏 酒店餅廚將混合咗食用銀粉嘅草莓白朱古力注入唇膏樽仔入面,打造出閃亮效果 棉花糖下有白朱古力脆脆,恍如一粒粒珍珠 最近法國嘅閃電泡芙(Éclair)風摩香港,除咗係Do姐去法國Shopping食泡芙掀起熱潮之外,精緻小巧嘅外形亦深得一眾香港女士歡心。酒店餅廚亦為下午茶加入咗閃電泡芙嘅元素,以甜中帶酸嘅法國血桃果茸製成呢款血桃泡芙,甜得嚟唔會太膩,令你喺電光火石之間就將佢KO!泡芙上面除咗有粉紅色嘅鏡面朱古力,更分別印有Benefit嘅Gabbi同「Laughter is The Best Cosmetic!」糖膠牌裝飾,話你知笑亦係最佳嘅化妝品! 血桃泡芙 草莓白朱古力波板糖 飲品方面亦係以Benefit為主題,分別係La Green同Queen,前者係抹茶牛奶,後者係荔枝玫瑰梳打,小妹當然揀荔枝玫瑰梳打,飲落甜甜哋又充滿淡淡花香,就好似女皇一樣高貴大方又不失嬌媚,娥眉淡掃但又不失莊重。不過小妹都係覺得食以甜點為主嘅Afternoon Tea配English Tea、Earl Grey或 Darjeeling Tea 會較佳,可以中和甜膩感! Queen(荔枝玫瑰梳打) Bartender特別調配的Queen 帝京嘅下午茶由1月1日起已經推出,直至3月31日完結,啱啱好橫跨正月十五中國情人節(2月22日)、2月14日西方情人節同3月14日白色情人節,非常適合Couple 一試,過一個浪漫情人節之餘,待女友如女皇亦係一個唔錯嘅選擇! 推廣期內,凡惠顧兩位用套餐(HK$508 包兩杯特飲)嘅客人都可以免費換領價值約$220港元嘅Benefit Cosmetics美妝套裝一份,包括毛孔細緻霜3毫升、修飾毛孔控油棒體驗裝、紫蘭胭脂水2.5毫升、深層保濕面霜、大放睛采眼線筆體驗裝同蜜蠟修眉優惠劵一張!小妹都換咗喇,不過提提大家,換領地點只有朗豪坊Benefit店同奧海城Benefit店,朗豪坊經常冇貨,所以去之前最好打電話查詢咗先,如果唔係會摸門釘!相反奧海城嘅貨源充足,最好去奧海城換啦! 一Set五件嘅Benefit Cosmetics美妝套裝,包括毛孔細緻霜3毫升、修飾毛孔控油棒體驗裝、紫蘭胭脂水2.5毫升、深層保濕面霜、大放睛采眼線筆體驗裝,小妹已經換咗喇! 店名:獅子樓 Lion Rock 電話:2622 6167 地址:旺角太子道西193號帝京酒店3樓 下午茶供應時間:每日下午3:00至6:00