小妹經常入屯門「闖蕩」,全因屯門有兩個大嘅Shopping Mall可以畀我大買特買,所以入屯門一係「濕平」,二係「濕平」,三都係「濕平」!目標係濕平,對食嘅要求自然求其餵飽個肚就算,所以一直冇深究屯門有咩食。上個禮拜同朋友約喺屯門睇戲,無意間竟然畀我發現咗一間值得推介嘅小店,發現屯門其實都有好嘢食! 門口實而不華,係幾容易被忽視嘅!不過各位下次行過就唔好再錯過喇! 我哋坐嘅係2樓,牆上有唔少掛畫裝飾。 店面有啲細,但位置都幾舒服! 呢間位於屯門明藝街嘅小店以蕃茄作為主打食材,全店出品差唔多都係以新鮮蕃茄入饌,可以話係「茄」迷至愛!店舖門口同店面嘅設計雖然比較簡單,容易被路人忽視,但佢主力做街坊生意,喺呢一區都薄有名氣,所以店內嘅客人全部都係住屯門嘅街坊朋友,冇過於商業化嘅吹噓,只帶有小區家庭味道嘅溫馨感覺。 特選蕃茄滑蛋濃湯肥牛烏冬 $42 成碗烏冬勁足料,仲有好多蕃茄呀!!!! 雖然主打蕃茄湯意粉,但我始終覺得烏冬掛湯會好味啲,所以就揀小店選用嘅日本讚歧烏冬!小店嘅蕃茄滑蛋濃湯系列分為普通($36)同特選($42)兩種,小妹當然揀特選,因為配料吸引啲,有炸雞翼、肥牛、雞排、豬排等,相反普通嘅就真係好普通,都係啲肉丸、芝士腸同蟹柳呀咁,平得嚟有少少Dry。客人可以自選配料一款,如果要加碼每樣就加$12,加普通嘅料就$5,豐儉由人,小妹揀咗「特選蕃茄滑蛋濃湯肥牛烏冬」,一上枱,香濃嘅蕃茄味就樸鼻而嚟,面層係嫩滑嘅炒蛋,次層係平時打邊爐嘅薄切肥牛,底後就係浸喺蕃茄濃湯入面嘅烏冬同茄塊茄蓉,鮮紅色一大碗,令人食指大動。蕃茄大部分已經溶化成湯變成蓉,但尚有幾塊漏網之魚,煮到超腍,連帶掛滿茄蓉嘅烏冬一齊食,令人回味無窮!湯底完全冇落茄膏或茄汁去製造濃味假像,所有味道都係出自新解蕃茄本身,所以老闆特別揼本用多啲蕃茄,令湯底更濃郁,客人亦可以食得健康啲! 特選蕃茄滑蛋濃湯香炸惹味雞翼烏冬 $42 朋友都叫咗個「特選蕃茄滑蛋濃湯烏冬」,不過佢鍾情雞翼,所以配料方面揀咗「香炸惹味雞翼」,雞翼經過醃製調味之後放入滾油入面炸,極速鎖緊每隻雞翼嘅肉汁,所以Juicy又鮮嫩!但小妹覺得三隻有啲唔抵食,如果有四至五隻會更好!另外,小妹略嫌烏冬煮得有啲過腍,如果可以再輕手啲,口感亦會啱啱好!不過小妹鍾意撐小店,少少瑕疵不為過嘅! 店名:蕃茄濃湯專門店TOMATO OTAMOT 電話:9822 2241 地址:屯門明藝街10號安全樓地下 開放時間:星期一至日07:30-22:00