近年韓國可以話係一個美食之都,好多人去韓國除咗係為咗追星同Shopping之外,亦係為咗食美食解饞,曾經去過一次韓國嘅我因為Miss咗韓國出名嘅醬油蟹而飲恨,今次終於可以一嘗地道韓式醬蟹嘅滋味! 其實小妹喺香港試過幾間受力推嘅醬油蟹店舖,但感覺味如嚼蠟,蟹肉欠彈性,仲有少少腥,可能係我唔識食啦,覺得只係「麻麻哋」,但尚可接受,始終我極愛海鮮,所以去韓式餐館總少不免叫一客醬蟹。而今次嘅韓國之旅,小妹亦特別去咗位於首爾醬蟹街嘅普樂醬蟹總店,位於首爾瑞草區江南大路97街嘅普樂,係呢條街上嘅元老級醬蟹店,始創於1980年,因受到韓國職業棒球選手嘅熱捧,令佢一夜成名! 兩隻細蟹 55,000韓圜爆膏嘅醬蟹認真令人唾涎!!! 最Update餐牌,可以叫3隻或追加1隻,當然2、3隻咁嗌抵啲啦! 嚟到呢度,Order醬蟹是常識吧?侍應一將醬蟹上枱,同行嘅幾位友人就「嘩嘩」聲,要知道除咗食大閘蟹同黃油蟹外,小妹真係未見過咁金黃豐腴嘅蟹膏!我哋嗌咗一客細蟹,原因係當日嘅大蟹早已售罄(當時係下晝2點),冇計啦,唯有食細蟹,當我哋愁緊係咪同香港食嘅Size一樣嘅時候,眼前嘅光輝將所有烏雲驅散!佢所謂嘅細蟹嘅Size竟然比香港嘅大一倍,真係令我哋既驚又喜!祭完相機嘅五臟廟之後,終於到小妹開餐喇!忍唔住大咬一啖,鮮甜嘅蟹肉同甘香嘅蟹膏立即滿溢成個口腔,蟹肉雖然軟腍但仍食到海鮮嘅鮮甜味同彈性,而回甘嘅蟹膏更增加咗味覺嘅層次,食完一舊之後,嗰種香甜滋味喺口腔久久不散,令人不禁想Encore再Encore!簡直同香港嗰啲又細隻又冇膏又冇味嘅醬蟹差天共地!醬蟹必須要用梭子蟹,肉質鮮甜結實,蟹膏較豐,而普樂嘅梭子蟹每日都由韓國西海岸新鮮直送,再加入祖傳嘅秘製醬料同30幾年嘅傳統腌製技術製成,難怪風摩了不少國內老饗!食醬蟹必須揀選蟹乸,皆因佢嘅膏比蟹公多而豐! 用飯拌蟹蓋上嘅蟹膏食係識食之人嘅食法。 睇過《來自星星的你》都會記得,全智賢喺入面食醬蟹嘅時候,將飯拌入蟹蓋入面,撈勻入面啲蟹膏食嘅方法,其實呢個方法真係絕妙!原因係唔單止可以食晒蟹蓋入面嘅蟹膏,熱辣辣嘅飯更增加咗蟹膏嘅鹹香鮮甜!首先用筷子將蟹蓋內嘅蟹膏挖出,再將米飯盛到蟹蓋上拌勻,最後加入店內提供嘅紫菜包裹啲飯食,又或將紫菜搣碎撒喺飯上拌食,同樣回味無窮! 如果對蟹膏有情意結,仲可以叫一客蟹籽拌飯,呢度所謂嘅蟹籽,並唔係香港日式壽司店入面蟹籽沙律嗰啲一粒粒貌似飛魚籽嘅蟹籽,而係蟹膏!喺熱氣騰騰嘅米飯上面,鋪滿蟹膏、蛋黃、紫菜、芝麻、麻油等,又係另一項傑作!如果多朋友同行,仲可以嗌埋個什錦海鮮湯,新鮮滾熱辣嘅韓式高湯加入鮑魚、花蟹、海蝦、大蜆、安康魚、扇貝、八爪魚同雜蔬等一齊燉煮,而且啲料多到滿晒出嚟,真係大滿足! 蟹籽拌飯 20,000 什錦海鮮湯 75,000韓圜 八爪魚需要專人處理剪細,服務周到! 活章魚 25,000韓圜 原價要5,000韓圜嘅雞蛋羹,只要喺韓巢Down個Coupon就免費喇!好友果然冰雪聰明! 前菜方面可以試吓生八爪魚刺身,上枱時啲觸鬚係咁郁,動感十足,而且質感煙韌彈牙,食嘅時候觸鬚嘅吸盤會啜住你條脷或啲牙,勁得意!小妹覺得食刺身就係應該咁!大家仲可以喺韓巢(http://cn.konest.com/)Down普樂嘅Coupon,好似今次咁,小妹嘅朋友就用咗Coupon換咗一客雞蛋羹(蒸蛋),又慳咗一個餸嘅錢! 客人可以上韓巢Down Coupon! 點擊圖片放大 門口成缸梭子蟹做招徠,小妹誓要展開一段華麗「蟹」后! 門口、走廊、牆上有唔少明星簽名,連黃曉明都係座上客之一。 店內陳設簡單 客人坐下便奉上精緻五小碟 店名:普樂醬蟹(總店) 地址:首爾市瑞草區江南大路97街9普樂大廈(地鐵3號線新沙站4號出口,步行約3分鐘) 開放時間:24小時