香港既餐廳真係多元化,耐不耐又會有新餐廳勾起小妹去潮聖既意慾。今次就去左間比較地道既Cafe,餐廳位於旺角通菜街(近女人街)兩旁的地鋪,餐廳有融合到香港地道風味x西式既新派菜,網上風評普遍都唔錯,使用網上訂位仲有主餐79折優惠。 原文網址: http://connie-hk.com/kaifong-cafe 點擊圖片放大 +3 餐廳環境整潔,周邊也有不同的裝飾和擺設;餐廳有多張二至四人枱,也設有梳化位。六點多去到時雖然未坐滿,近八時已坐滿八成,人流不斷。 餐牌上的選擇可多了,單點的有湯、全日早餐、鐵板烤扒、意粉/意大利飯、拉麵/稻庭烏冬、皇牌沙河粉、小食等;甜品有港式雞蛋仔、法式西多士同德國班戟,相片望落都吸引,散叫餐牌價錢算是大眾化,訂位後叫主菜仲有79折,抵!(甜品係無折扣的) 另外都有做晚餐鐵板烤扒套餐同河粉套餐,不過估唔到連日本A3黑毛和牛都有得食$5xx,唔平,不過呢個價錢老實說我會寧願叫其他食物。 (餐牌太多放在文末) 烏龍拿鐵 $38 望望餐牌竟然有烏龍拿鐵,二話不說點黎試下。味道方面是飲到茶味的,但就唔算明顯,反而佢偏重咖啡苦。唔...唔太岩我飲。 一加一 (套餐+$12) 其實係芒果菠蘿藍蝶花凍飲,藍蝶花本身無味,飲落係芒果x菠蘿糖漿既味道,靚之餘都幾解渴。 碗仔翅 (套餐) 餐牌除左食材配搭上新穎,連餐湯都一律轉為做港式風味既「碗仔翅」真係幾有諗頭。跟餐細細碗,望落都算多料,味道正常,仲好細心有埋紅醋比你加。見到單點大鍋既碗仔翅,入面仲有跟原隻素鮑魚同海參,好盞鬼。 皇牌卡邦拿拉沙河粉 $88 轉程黎就係為左呢款變奏版卡邦尼,老闆將平時用開既意粉轉做河粉,估唔到一點違和感都無。食落河粉質感幼滑,掛汁程度又比想像中來得多,卡邦尼的味道調得恰到好處,不鹹不膩,加埋煙肉同菇片,好食! 烤西班牙黑毛豬配松露汁 $92 烙上網紋的黑毛豬,伴菜有味道不錯的薯格、烤茄子和車厘茄。講返黑毛豬,質素比想像的來得好,雖然塊黑毛豬扒一百蚊都唔使,但係你會食到帶爽既肉質,仲有烤過的微焦香,咀嚼中也嚐到肉香。喜歡的更可以蘸上松露汁,黑松露味道不算太明顯,所以不用擔心會擔了味道。 紫薯吉士雞蛋仔伴雪糕 $58 幾鐘意佢地既雞蛋仔既配搭,賣相又靚,用既小鐵鍋又靚。除左紫薯仲有阿華田、Tiramisu同抹茶味可以揀。 雞蛋仔上放左吉士醬,仲有紫薯茸,旁邊係一球香芋雪糕、半溶棉花糖同少少鮮果。 如果你係好期望雞蛋仔充滿蛋味既話會勸你叫其他甜品,因為基本上呢個雞蛋仔係無蛋香,要靠吉士醬同紫薯先有味;質感似雞蛋仔形窩夫,咬落帶點煙韌口感,不過全部配料加埋一齊食都唔差! ※本文以用餐當日的環境、服務和食物質素為準,口味亦因人而異,文章只作參考之用。 街坊Cafe | FACEBOOK、IG 地址: 旺角通菜街1號威達商業大厦地下1E-1F號舖 電話: 9061 3820 營業時間: 星期一至日 12:00-23:00 餐牌部份 點擊圖片放大 +11