[旺角] 老街 ‧ 來到「老街」延續台灣的味道 | 牛肉麵湯底味道薄弱,肉燥飯較為可取~木魚炸豆腐香口好食!


返黎香港兩個禮拜多,都仲係好掛住台灣個邊既食物,正所謂又平又抵食,用料又足! 所以知道旺角原來開左間台灣菜既餐廳,一見到台灣菜又會想去潮聖的小妹,又忍唔住要去覓食啦。


星期六中午,與他決定去一試。餐廳位於豉油街附近,頗易搵的。餐廳名稱雖然叫「老街」,但入面的裝潢和佈置都係屬於較現代設計,與「老街」這店名,還頗不相乎的。就有一邊的牆壁貼滿左懷舊海報和貼紙,才較為有點感覺。
.
那天餐廳內還未坐滿客人,所以店員安排了我們坐四人位,坐得還滿鬆動的。不過隔離就係出菜的地方,店員進進出出的位置較窄,幾位店員還要企在隔離高談闊論,還是有點煩擾。
.

看著老街的餐牌,有分成風味小吃、肉燥湯麵/拌麵、飯類、招牌牛肉麵、蕃茄湯麵、麻辣麵、特色乾拌麵、台式小菜和台式特飲等,款式都頗多,而且價錢不貴,飯麵類都係$3x-$5x,小食十多元就有交易。
.
水蜜桃冰紅茶 跟餐+$10
一向都知呢類台式紅茶都係用糖漿溝出黎的,所以一向都會叫佢少甜,不過都依然過甜,可想而止唔叫少甜會幾甜,下次叫花茶可能會好點。
.

木魚炸豆腐 (大) $29
豆腐有分大同細份,細既有兩件,所以我地叫左個大有四件豆腐。每件豆腐既份量都唔細,外層都佈滿左炸粉同木魚絲拎去炸,咬落熱辣辣,而且入口外脆內軟,豆腐十分嫩滑呢,配埋甜醬油,面頭仲放左大量青瓜絲平衡油膩感,真係好好食!
.
紅燒牛肉麵 $55
返到黎香港又掛住台灣既牛肉麵,所以叫左一碗黎止止癮,話說係香港要搵一碗好食既牛肉麵真係唔易,暫時覺得好食既都係程班x。
.

牛肉麵的賣相都不錯,有約四件份量不少的牛筋牛腩,上面仲加了蔥花吊味;另搭左兩條白菜,不過麵條就係用上幼身既麵條,望落較為普通,相信用返寬麵條會更吸引。
.
牛肉麵除左牛肉外,最緊要係個湯底,先呷一口湯底,湯頭的藥材味好薄弱,味道淡,食食下仲覺得好似淡味版出前一丁牛肉麵既湯底,頗失望;
.
好彩牛筋牛腩咬落都算鬆化同入味,叫做未差得晒。
.
鹽酥雞肉燥飯 $48
除了有份量不少的鹽酥雞,配菜仲有半隻鹵水蛋和雜菜,但驟眼望落肉燥份量偏少,後黎問佢地可唔可以加返點,佢都有加比我地。話雖如此,但一諗起台灣既肉燥都係幾蚊碗,香港要幾十蚊碗,所謂既肉燥份量卻偏少,認真唏噓。
.
講返肉燥,其實味道係唔錯,半肥瘦既豬肉切碎再加上醬油去煮,唔會太鹹,味道調得剛剛好,用黎拌飯一流;
.
至於鹽酥雞入口頗香口,咬落富肉汁,炸得還不錯。
.
.
.
老街 Old street
地址: 旺角豉油街65號地舖
(港鐵旺角站 E2 出口, 步行約6分鐘)
電話: 2779 9283
營業時間: 星期一至日: 12:00-23:30
================================
(喜歡的,請按讚支持,是給我很大的鼓勵啊 
This entry was posted in 中國菜, 九龍, 家庭聚會 and tagged , , , . Bookmark the permalink.