三名年青人, 去年年尾於灣仔, 夾手夾腳以酒店級質素, 街坊價錢賣西餐. 今年年頭我吃過一次, 深深被Stephanie的「神級墨西哥卷」所吸引. 為何我沒有出食文呢? 因為第一次被墨西哥卷迷住, 拍照不多, 於是請Stephanie私底下幫我拍數張相片, 誰知等了又等, 也遲遲收不到她的相…(唔通Hea我…) 於是2月時再問一問S, 她竟然說:「我個拍擋兩星期前話辛苦, 講咗一聲話走就走咗!」(吓??自己生意唔係愈忙愈開心咩??) 三人食肆, 變成獨力經營, 終於S也捱病了, 2月中被迫休息了半個月. 當S最徬徨無助之際, 當年教她煮食的師父輾轉得知事件, 二話不說放棄高級食肆的高薪厚職, 轉過來為徒弟拼搏. 師父:「最緊要做得開心, 幫得就幫啦!!」(好感動, 不過師父話唔想上鏡…咁鬼怕羞) 火鳳凰重新, 大師級救駕, 我當然要來再次光顧, 今次手勢更勝兩個月前…(於是TickEatEasy就成為我第一間食兩次, 才能出文的食肆.) 強烈推介這裡的墨西哥卷, (絶對無收錢, 絕對良心話), 全港島區最最最好食的素菜蘑菇芝士墨西哥卷, 超班神級之作. (好食到喊!!) S說:「從前於一間英式茶室被迫日日苦練墨西哥卷, 估唔到今時今日可以用得著」 S的墨西哥皮烘得乾脆「啱啱好」, 配上內裡的濕潤餡料, 簡直天作之合到十足十米奇襯米妮, 葛民輝夾林海峰一樣. 一食上癮. 今晚試的印度烤雞墨西哥, 好食, 但少了上次的素菜款的驚喜, 原來S說:「因為墨西哥卷一定要夾芝士,如果有埋菠蘿粒, 番茄粒仲正呀!」(點解唔早響呀...) 這裡的意粉也是一絕, 入味到不得了, 大師級即是大師級, 而且塊魚又厚又大件. 不論是上次的蕃茄汁, 還是今晚的蕃茄忌廉, 絶對睇相都會肚餓的級數…(只是個人愛淡口味, 今晚的龍脷灑多了味粉...少少鹹) 除了墨西哥卷, 這裡的甜品一定一定要試, 因為是S親自操刀, 上次壹仔推介過, 不過第一次來時S的手扭傷了, 沒有得吃, 今次可以打孖上呀!! Apple Crumble, 青蘋果加富士蘋果配上肉桂, 連奄尖的阿太也讚薄切刀功了得 :「酸酸甜甜, 蘋果軟, 牛油粒脆, 好得意」 我就愛Espresso配朱古力, 加雪糕, 冰火二重奏, 又甘又甜, 又暖又凍. 難怪當日壹仔高度激讚啦!! (真係專登嚟第二次都抵晒). 我問S為何要走街坊價路線呢? S無可奈何說:「我地一開舖時, 隔離左右已經好心提我地唔好賣咁貴, 因為E兩條街啲客都唔受貴價嘢!!」(係咁姑寒嘅咩??E條街仔啲人??) (Stephanie Whatsapp 提供) 原來初初開業, 資金有限, 所有裝修也是由S她們三人一腳踢, 「招牌都係自己油, 我哋啲枱係沿用上一手, 自己買木板黐上去, 因為當時想最短最快幫舖頭大翻身就開業」(原來半年前隔離間舖都未執) 雖然, 當日三人一齊努力, 今日只剩S一人打拼, S笑言:「第一次創業, 我唔蝕到無錢開飯, 我都會繼續.」 今晚S笑得較兩個月前更輕鬆, 我想應該是得到師父義無反顧幫手, 暫時可以放一萬個心啦!! 我相信TickEatEasy單賣超班墨西哥卷, 店舖不止不會蝕, 分分鐘半年後可以打通隔離一齊做. 加油呀!! 灣仔道177~179號保和大廈地下F舖 味道: ★★★★★ 環境: ★★★ 服務: ★★★★ 抵食: ★★★★★ 推介度: ★★★★★ 大仁生活facebook http://dayanlife.blogspot.hk/2015/03/tickeateasy.html