孕~突如其來的小生命 – 公立醫院vs私家醫院 / 陪月!

發現有左小生命後,第一樣諗既就係公立定私家生好!
相公一開頭都好堅決咁話緊係私家生,佢有好好咁話錢都唔係問題 :p
不過作為一個理智既孕婦,我就拿拿聲打俾我既助產待朋友仔了解一下~
以下為我個人見解~大家唔好太認真~

1. 價錢
身為香港人,有香港永久居民身分證既您同我,基本上係公立醫院生只係有限錢,無論係順產定開刀(由醫生決定)~講緊都係一千幾百(咁都睇返你有無要求要半私家房呢啲la~)

私家醫院就大概$25000起,醫生費另計~順產、開刀都唔同價~我有幾位親友都係私家生,順產既就$30000內,開刀既就$55000內都已經全包~當然唔同私家醫院真係差好遠~如果好似最近一單新聞話有突發事,最後十幾萬就另計…

2. 質素
助產侍朋友正正就係我本身嗰區到既公立醫院做,所以佢知道有幾忙同人手不足既問題,所以佢幾位同事生都去左瑪麗生~
一來瑪麗既產科醫生係全港最有經驗的(因為所有有機會有危險既孕婦或BB都係瑪麗接生,所以好多時一話孕婦、BB有事既新聞都關瑪麗事…)
二來瑪麗係港島,香港大學再入啲,基本上孕婦唔算太多,無論醫生、助產侍都有更多時間同孕婦溝通~

私家醫院當然住既環境、食物都應該好過公立,不過如果BB或孕婦係懷孕期間發現有異樣的話,佢地都會轉介返去政府醫院~所以到如果真係生嗰下有乜突發狀況,個人覺得私家醫院既應變能力會差少少 :p
不過人手方面又應該會好過公立醫院少少~

3. 鼓勵餵母乳 / 準爸爸陪產 / 剪臍帶
公立醫院主要都鼓勵餵母乳,住院期間都會教/迫你餵~所以基本上無得訓!因為餵母乳BB好易吸收,真係每2-3個鐘就餓…又要餵~
而且瑪麗係鼓勵有人陪產的~除非預計到生產時有機會發生突發事件,否則準爸爸都可以一同入產房同可以剪臍帶~
其他公立醫院就唔確定係咪鼓勵陪產了~

私家醫院都鼓勵餵母乳既,不過如果你想既奶粉都ok既~
而陪產、剪臍帶就要睇返個別私家醫生/醫院,同埋有機會另外收費~

4. 順產 / 開刀
公立醫院係無論點都要你先試順產!除非你生左好耐都生唔到…咁先可以改開刀…係由醫生決定的~

私家醫院最大既好處就緊係有得揀順產定開刀la~開刀仲可以揀個好日子添~如果好信風水既,呢樣都幾重要!

5. 產前檢查
只要你係香港永久居民~公立醫院所有產前檢查都係免費的~一般check有無唐氏綜合症、抽血、驗血糖、聽下BB心跳呢啲都有~不過照超聲波就無la~除非你book左係瑪利生BB,否則照BB結構(可以睇到BB性別、有無齊手手腳腳、心臟、小腦等…)、飲糖水就未必個個人抽驗~只會係你咁啱或屬於高危一族先會必定check~

而私家啦咼,每次產前檢查都預大約$1000~次次都會安排你照超聲波~而check唐氏綜合症、照BB結構、飲糖水,只要你想又有錢,就緊係可以做到!我問過照結構係$3500-$11000都有…大家自己了解~

********************************************************************

拿,最後我同相公都覺得醫生同助產侍既質素最重要,我地覺得生個小朋友都只係留係醫院3日,環境呢家野我到時都無心情理,我只關心自己同BB既安全,最怕有突發狀況…

當然價錢都係我呢個理性孕婦既考慮~由於係一個突如其來既小生命,我心中budget有限…如果我生嗰下已經用左3萬-6萬,我仲想請最少1個月陪月(陪月由$18000-$25000不等,我心水有2個,都好有經驗,一星期6日,每日8個鐘~)…真係好金…=.=…

所以最後我就決定用住私家醫院嗰筆錢換成2個月既陪月了 >3<~
而產前檢查就政府、私家2邊進行!(最後瑪利仲接受左我誇區,所以又慳返照結構既錢~ya~)
2個月有人服侍好定係生嗰3日住私家好~大家就自己諗lu~
當然,如果有無限筆直就緊係私家+陪月la~ :p

Facebook : 80後的人妻「旅」友
邀稿 : wingring417@gmail.com / wingring@ymail.com
This entry was posted in 兩性關係, 親子 and tagged , , , . Bookmark the permalink.