2019年5月30日親身攝於上羚羊峽谷 早年係網路上,見到一張據講係全世界售價最貴嘅照片(直至今日都依然係),相片由澳洲攝影師Peter Lik所攝,售價為650萬美金,數字實在驚人﹗﹗到底張相有咩咁特別﹖﹖ 張相嘅拍攝地點,係喺美國西岸亞利桑那州(Arizona)一個名為羚羊峽谷(Antelope Canyon)嘅地方。山谷獨特嘅地型,陽光只能係狹窄嘅石縫間照入峽谷,帶有幾份神秘,亦因為咁,相片取名魅影(Phantom)。 正因為哩張相,開始有想到美國嘅念頭,好想親身去感受一下哩張相嘅實際場景,到底有幾震撼﹗不過,後來搵資料先知,羚羊峽谷有上、下(Upper/Lower)之分,而整個羚羊峽谷,都由當地嘅原住民(Navajo)所管轄,假如要到訪,就一定要參加由原住民營辦嘅觀光或攝影團,而世界各地冒名而來嘅旅客眾多,嘗試左好多次經網絡報團,都發現名額已滿,於是,一拖再拖﹗﹗ 2018年12月,瘋狂地,係未買機票、未計畫行程嘅情況下,我地就報左一個上羚羊峽谷嘅攝影團,難得有位,就係咁,我地就開始計劃5月份嘅美國西岸自駕遊﹗﹗ 美國好多國家公園,自駕遊當然係必然之選,而好多人都會覺得,係香港以外嘅地方自駕,就梗係要去簽個國際牌啦﹗到底係咪真係嘅哩﹖﹖問過一啲經常會到外地自駕嘅朋友,佢地一般都會話,唔理啦,百幾蚊用一年,理鬼得佢,都係照申請架啦﹗﹗ 嗯,百幾蚊之嘛,都係申請左先﹗無錯,百幾蚊唔係貴,不過有時做野都要知道點解架,唔好人地話係就係﹗ 根據自己嘅過往經驗,原來係唔一定架喎﹗﹗有申請過所謂國際牌嘅人都知,其實個本綠色簿仔都只係一份翻譯文本,無咩特別﹗而香港所簽發嘅駕駛執照,本身都已經係中英對照,所以,好多地方租車,根本就唔需要睇個本綠色簿仔﹗﹗ 我地係外國自駕嘅經驗唔算多,就只有紐西蘭、德國、瑞士、意大利、澳洲同今次嘅美國,而當中,只有係意大利係標明需要國際牌,其他地方我地都無申請到國際牌,澳洲都有帶(因為去完意大利個本未到期),但租車公司無睇過﹗﹗以下係今次係美國租車時,租車公司列出對駕駛執照嘅要求,其他國家亦大同小異,除非旅客本身張駕駛執照無英文,先需要一份英文譯本﹗﹗ 哩份係今次美國租車公車例明對駕駛執照嘅要求 當然,做人唔好道聽途說,凡事都要做FACTCHECK,假如真係需要到外地自駕,又想知到底要唔要個本所謂嘅國際牌,最穩陣嘅做法,就係直接影左你張駕駛執照,出發前SEND過去問你準備租車個間公司﹗又或者,學我朋友話時解,百幾蚊姐,都係簽左穩陣﹗只係我地生性叛逆,覺得明明唔使,做咩我要做,咁姐﹗﹗﹗ 另外,今次自駕經歷左係沙漠地帶壞車,要搵拖車救援,好彩我地有買到保險(租車公司個份),所以一毫子都唔使再比,租車公司仲要賠返一晚住宿比我地添,詳情等我有心機寫先再算。