諗返起都幾得,以前既我係最經常會買外賣既人,皆因唔鍾意自己一個係餐廳食野,感覺好孤獨,又好怕四圍既人既目光(其實講到底,都係自己既安全感作祟,人地鬼得閒理你咩﹗),於是,假如唔係約左朋友,大多時間都會去買外賣,拎返屋企/公司食﹗如是者,食一餐飯,大盒小盒的,都唔知要掉幾多落垃圾桶。 之但係,又明白,打工仔個個趕返工,食晏時間四圍都好似打仗咁,要等位堂食都唔係易事,有時唔想煩,特別係夏天,唔想熱辣辣走落街,叫/買外賣都確實係一個選擇﹗﹗ 近幾年唔使返工,獨處既時間多左,開始習慣去小店坐低慢慢食,有時同店主/店員傾下計,享受一下寧靜既時光,習慣左堂食,反而唔係好想買外賣,感覺真係好浪費,少說起碼有一個膠飯盒加一個膠袋,仲有餐具,要不有時叫湯麵,就起碼有兩個發泡膠兜同蓋,連野飲的話就更加多﹗﹗即使唔站起環唔環保既角度,拎住個包野掉落垃圾桶,諗起都覺得煩﹗﹗ 唉,人生本來就係矛盾,又想舒服,又想環保,談何容易﹖﹗環保對上班一族泥講,真係要好大既決心﹗﹗ 偶爾朋友趁食晏時份過嚟探班,奈何自己又行唔開,出唔到去堂食,但又無理由叫朋友捱肚餓,於是朋友次次都要被迫帶埋外賣過來,邊食邊傾,而自己就坐係度睇住佢食﹗ 話說上星期五又有朋友話午飯時間會過來坐,而自己實在唔想見到個堆外賣盒,唯一辦法,就係自己帶盒幫佢準備定午餐,這麼一來,咁佢又有得食,我又唔使見到個堆討厭既膠盒啦﹗﹗而要帶盒去買外賣,如果唔係相熟既餐廳,有時都唔敢搞人,免得妨礙人地繁忙既午市時間,附近可以肯定走到塑,又有好味午餐既,第一時間就諗起我既素食飯堂。 之前一日已經放低左兩個盒要泥裝主菜,跟住星期五當天再帶多兩個盒去裝沙津,仲有水杯同埋熱水壼 一餐無塑午餐要準備既野 為左唔想麻煩,所以揀左沙律 朋友點既日式海苔蟹味菇意大利麵 我要既辣豆乳芝麻野菜意大利麵 老闆娘怕飲杯係外賣期間會倒瀉,所以直接比茶包我(非賣品)自己沖 餐廳有自助酙水區,熟客可以自助撲水 於是提早一日問左朋友想食咩,然後拎定外賣盒放低係老闆娘度,約好左第二日幾點會去拎,咁就有健康又抵食既素食午餐啦﹗﹗拍檔見到有問,食一餐晏,要拎住幾個盒去買,唔麻煩咩﹖﹖煩架,煩到嘔添呀,約人食餐晏要拎一大袋既餐盒走來走去,食完又要洗,但起碼唔使等幾百年先分解到,食一餐飯唔使塞滿個垃圾桶,又難得朋友唔介意,又難得老闆娘肯配合,仲要係食素添,無理由唔做姐,再麻煩都值得﹗﹗ 相關閱讀:滋味素食 / 食店續集(上)