近排忙於怪誕十月嘅飯局,所以好hea好懶,每晚臨訓前都諗住第二朝早點起身寫下野,早係早起呀,每朝依然準時6點起身,但總有一大堆想做同要做嘅事,於是無無聊聊又過一日。 今晚實在唔寫唔得,係電話打都要出左先,哈哈,其實係因為搞肚痛被困廁所,用唔到電腦,局住要用電話出文。 話說今晚係去左食自助餐慶祝,一如過往,唔係好食野嘅人去食自助餐,都係食下蠔,食下海鮮咁,但選擇相信只係食得太多太飽,突然出現搞肚痛嘅情況,所以暫時唔開名住,無謂禍及無辜。 自問忍肚痛能力都算高,但係金鐘上巴士,都未過完成條西隧已經知到唔對路,於是示意隊友要落車搵廁所,唉,廿幾蚊程巴士,搭左一個站就落車,真係罪過,罪過。 鬼叫肚痛咩,蝕都要落架啦!之不過,其實要係九龍站搵廁所都唔係易事,再加上搞肚痛過程,仲要四圍行去搵廁所,加速腸道活動,確實係一件好危險嘅事!由九龍站巴士站(往九龍方向)落左車, 仲要上樓梯,過天橋,落樓梯,肚痛中,點呀謂,真係好彩叫做都幾忍得肚痛,同埋好彩未係細菌性腹瀉,所以都仲忍得住。 相信係九龍站落過車嘅人都知,要係個度行返入商場搵到廁所都真係有一段路,落左樓後,好似係係天際100嗰附近有個閘口,有個只可職員進入嘅閘口,都只好硬著頭皮問當值員工,可否借廁所一用,當時更亭入面有一個上左年紀嘅阿姨,同一個四眼後生仔,個個後生仔唔係好想理我地,但我向阿姨表示人有三急,仲要係對面巴士站行過泥,阿姨已經好好咁表示,有個職員廁所,但只有男廁,問我介唔介意,唔介呀阿姨,已經唔想多作解釋。 依據阿姨指示嘅方向去搵,但唔係好覺眼,回頭諗住再問清楚之際,發現阿姨正因擔心我地需要幫忙而跟左過泥,真係十級感動!阿姨不停話,唔使唔好意思,明白搞肚痛嘅唔舒服,親自帶左我去搵廁所(好彩咋,及時趕到),阿姨一直都擔心,因為廁所門無鎖,吩咐隊友係門外守候,又問要唔要藥油,要唔要休息一陣,之類之類,總之就係人間有情呀!當然,廁所環境唔算好乾淨,但鬼叫自己搞肚痛,有地方可方便已經好好,仲有窩心問候,真心覺得好彩,事後想向阿姨道謝,但係更亭搵左一輪都唔見,唯有向四眼哥哥講聲唔該,請求代為轉達。聽朝要了解下,個度到底係邊個機構管嘅,要正式寫封感謝狀比姨姨。 回程唔敢再擔巴士,而搭東涌線轉西鐵,萬一有狀況沿途都可搵到廁所,的確,係中途係再要上廁所嘅,到底係好彩定唔好彩 ,都係見人見智咁啦!