話說,每年既4/5月都係出門既好季節;又話說,因航今年新增香港直飛比利時布魯塞爾既新航班做推廣優惠,唔使港幣4千(其實連稅係要4千6左右既);再話說,今年諗來諗去都未諗到去邊(本來想去美國影羚羊峽谷,但哩段時間既攝影券早已爆滿,似乎又要等出年﹗),於是,兩個傻人又準備4月21號凌晨飛比利時,今次去15日(哩個時候我地應該已經人在荷蘭)﹗﹗ 比利時唔大,所以可以過埋荷蘭同盧森堡玩,話說,我地兩個鄉下仔係未去過法國既(唔知點解身邊朋友總覺得我地去過好多地方﹗),所以可能都會順道過一過巴黎開下眼界﹗﹗ 行程唔講住,除左平日帶開既物品(詳見:細味塔斯 - 行裝篇),今次有無咩特別野要準備哩﹖﹖ 橙色衫 - 我地一落機係會先過荷蘭玩左先,回程先係比利時遊覽,而4月27日,係荷蘭既國王日 KING'S DAY﹗橙色係荷蘭既國色,而國王日係佢地既大型盛事,到時個個都會由頭橙到落腳咁出街玩,我估到時實比人迫死,不過難得遇啱時間,梗係要去湊下熱鬧﹗我地兩個都有件鮮橙色既風樓,但買左之後,發現原來世界各地既清潔工人都會以橙色衫為制服,於是,近年都唔敢著﹗哈哈,正好拎出泥著下﹗﹗ 荷蘭既國王節,所有人都會以橙色作裝扮 電話咭 - 雖然今次唔使自駕,全程都會以火車穿梭各地,亦已下載離線地圖,但數據仍然重要,以便查詢火車班次﹗今次起碼要去三個國家(假如去埋巴黎就四個﹗),電話咭方面點安排好哩﹖早前係網上見到有介紹微信同荷蘭電信公司KPN合作既電話咭,HKD85,15日4G無限數據(所謂既無限,其實係首1.5GB就4G,然後就會變龜速,對於我地泥講夠用了﹗),仲有30分鐘通話時間,啱用喎,KPN係荷蘭最大既電話供應商,假如到時真係唔得先再係當地搵吧﹗﹗於是又走左相熟既電話舖買左張﹗ 今次試下哩張KPN既電話咭 都係要有撥號先安心 相機就當然要帶啦,去完塔斯返泥,發現部MARK III個CMOS有塵,於是上個月拎左去抹,又好彩,原來佢地做緊優惠,本來要400,結果平左100。反正上開去,又八下G3X個VIEWER﹗有時唔想拎大機,G3X都已經好夠,性能好好,最正係可以ZOOM得遠,唯一唔慣既係佢無VIEWER﹗有時係強光底下,根本睇唔到個顯示屏,唔知自己影緊咩,見佢個新款VIEWER無第一代個隻咁大舊,決定都係幫部G3X加返個VIEWER,其實都要千五蚊架,不過,我地唔係經常換機既人,都係幫部機升級姐,無問題啦﹗﹗ 早排拎左部MARK III去抹塵 順便幫G3X買埋個VIEWER 個人覺得G3X都好用,功能卓越,不過始終唔慣無VIEWER,特別係當遇上強光,齋睇顯示屏根本睇唔到影咩 小腳架/自拍棍 - 我地主要都係影花影景,好少會自拍,所以一直都無自拍棍﹗之前有時參加講座會有送,但都比哂人,自己無留﹗﹗不過早排因為要自拍手語片交功課,於是買左個可夾電話既小腳架﹗今次應該無咩影星既機會,哩個小腳架配G3X應該夠用啦﹗當然,部MARK III都依然係要帶腳架,以便影夜景,但起碼叫做帶少一枝腳吖嘛﹗﹗ 可作自拍既小腳架 調味料 - 哈哈,近年外遊,除左愛上自駕,仲鍾意自煮,好過晚晚頭痕出去搵咩食,但發現未必間間住宅旅館都有調味料,所以最穩妥既做法都係自己帶埋去好啲﹗﹗ 預左會煮野食,免得四圍搵調味,都係自己帶定好啲 出門既次數越多,期待唔同左,原來放入行履箱既野都會唔同左﹗﹗有見之前幾次去日本賞櫻都出現嚴重敏感症狀(真係只對櫻花,之前係塔斯既薰衣草原又安然無恙),都係有備無患,出發前去醫生度配左比較強既防敏感藥,同埋買定舒緩敏感既眼藥水,希望用唔著啦﹗