好友聚會,當然要飲飽食醉 早前同好友試過元朗嘅數字火鍋,兩人都念念不忘。於是當其他朋友再約聚會,兩個都不約而同想再試一次,不過,今次要就埋另外兩個朋友,地點就揀左尖沙咀嘅分店﹗ 四個人(本來五個,有人臨時甩底)約左星期四晚7:30,用餐時間本來係100分鐘,不過一入到去店員已經好貼心咁話,今晚客人唔多,你地可以慢慢坐,好感動啊﹗ 查實約人食飯,仲要係打邊爐,梗係想慢慢坐慢慢食,不過假如店舖多人等位,都會識做唔想阻住人做生意﹗大家好來好去,講明萬一有客就要按基本用餐時間,要不就不作打搞,其實咁咪好囉,互相尊重,食客又食得開心﹗﹗ 星期四晚嘅赫德道,可能加上上星期四又凍又雨咁,外出食飯嘅人唔多,所以店內真係唔多人,老闆就有時間過嚟講解餐牌上各種牛肉嘅分別,哈,查實聽完一輪都係唔記得嘅,都係求其係個平版度亂點一通,反正每份價錢唔貴,總之就咩都點嚟試下。 最初都仲有心機影下,諗住方便第時識點,之不過,對於唔係好識食嘅人,根本就無心裝,點完影完食完都依然係記唔到叫過咩食過咩﹗唔緊要,總之下次都係咩都叫下咁囉﹗﹗ 每間分店都有唔同主題 店內有自家啤酒賣 牛肉火鍋專門店當然要有牛牛嘅擺設 看圖解過,自己睇下想食邊部份比較容易 第一輪都好認真影下相,但食完叫再點返經已忘記叫過啲咩 佢地個花雕醉蜆鍋真係無得輸,98蚊好抵食 4個人,每人唔使300蚊 朋友點左手工啤飲,話麥味好香 食店除左食物質素,招呼都係好重要嘅原素,哩間連鎖店真係唔錯,店員耐唔使過嚟傾一兩句,招呼周到。佢地用平版電腦落單,點野飲想走飲管都唔知點算好,醒目店員聽到,就好自動咁幫我地走飲管,整體印像真係相當好,地方亦闊落,唔會好似某啲火鍋店咁迫,應該可以繼續幫襯。