2018 成功續領BNO過程分享 (過期13年,無副簽)

整個申請過程只係需要14日!!

 

話說近年有不少香港人都紛紛去續領已過期多年的BNO,先不討論BNO與特區護照那一本比較好用,但手持兩本護照總比只用一本好!

原本一早已經有打算去續領BNO,但當時不知道我的舊BNO是否還在,後來得知我媽媽一直把我的舊BNO好好保存後,又懶得去影證件相,於是一拖再拖,直到最近在準備出發到日本前的各種事項,終於決定要在出發到日本前續領BNO!

(我已經用特區護照取得WH簽證,簽證已貼在特區護照上,但還是想同時帶BNO去日本,萬人不幸遇上意外或天災,如果中國領事館唔幫我,還可以到英國領事館求助,當買多個保險。)

 

申請網址:https://passportapplication.service.gov.uk/ips-olc/

申請過程一啲都唔難,只需不繼答問題,只係問嘅問題比較多,網上亦有大量教學,雖然系統有更新過,但大同小異,問題不大,所以我亦無打算遂個STEP教大家,純粹分享一下我嘅續領經驗,提供多一個參考比大家。

 

我嘅情況係BNO係2005年過期,舊BNO無遺失無損毀,但張相係2000年影嘅,當年我得7歲,個樣同宜家當然有差別。

但為左唔好煩,當佢問到 “Are you still recognisable form the photo in your current passport? ” 嘅時候,我答左Yes(係長大左姐,又唔係整左容,應該仲認得出嘅)

可能因為我嘅舊BNO係兒童passport,又過期多年,所以最後歸類為 Adult first time.

因為係Adult first time 不是renew嘅關係,要比嘅資料多左,包括父母親公公婆婆出生日期,出生地點,結婚日期⋯⋯等等

但由於打*係必填,其他可以漏空,而我爸爸亦過左身多年,好多資料都提供唔到,
最後我只提供左母親全名、出生日期、出生地點、公公全名,其他都無提供

父母嘅資料只有母親係必填,父親資料唔提供亦可以,而公公全名亦係必填,其他都可以漏空。(好彩英國要嘅係母系資料,要我搵返已故爸爸嘅資料相信都要花一段時間。)

另外會有疑問嘅地方係 “How many uncancelled passport are you sending us?”
呢個我見網上教學有人話one有人話two
我就填左two : 舊BNO 及 特區護照

由於真係有好多問題過程比較長,如果搞到一半唔得閒的話可以SAVE低佢記低自己username, 72小時之內都可以隨時登入繼續申請程序。

填好晒所有資料又double check左無錯的話就要比錢。
我申請嘅時候(2018年8月)嘅收費係 32頁£105.86, 48頁£115.86 (加左價?)
用信用卡比,張卡唔洗自己名都得

比左錢之後佢就會有個PDF檔比你下載,Download左佢再睇清楚佢比你嘅指示,
Page 2有Document checklist, 可以跟住佢check一次要寄去嘅資料。

 

證件相我自己用手機影,用Canon SELPHY印相機印出黎,再自己cut做到35x45mm,白色底
HMPO係要求灰色底?(be taken against a plain cream or plain light-grey background),但我用APP影底色只有紅白藍揀,唯有試下用白色

 Page 5 嘅Declaration Form下面有要求副簽,但我漏空左!

如果print出黎嘅Declaration Form有副署部份即代表需要副署,呢度唔建議大家漏空,
即使我無副署亦能成功續領,亦唔能夠代表其他人都可以,畢竟一切都係HMPO話事。
如果能夠搵到人幫手副署的話當然最好,但如果真係搵唔到人幫你副署的話可以嘗試一下漏空,後果自負!

 

 

最後我寄左嘅文件:

  • Page 5 嘅Declaration Form (係方格內簽名,唔好出界,下面寫日期)
  • 2張證件相(我用個細透明袋入住左)
  • 香港出世紙正本
  • 已過期BNO正本
  • 香港永久居民身份證雙面彩色影印本
  • 特區護照彩色影印本(每一頁,包括無蓋過印嘅空白頁以及底面)
  • 住址證明(我是用日本語能力試驗嘅準考證
  • 母親香港出世紙彩色影印本
  • 父親死亡證影印本(黑白)(找唔到正本,只搵到黑白影印本)

 

郵寄方式有很多,最多人用當然係香港郵政,可以選擇特快專遞,港幣$200起(2日到),又或者普通空郵+掛號,約港幣$50-60(5-7日到)。如果不是太趕時間,用普通空郵+掛號就好,比較便宜。

當然還有其他選擇,例如DHL、FedEx、UPS、順豐等等。

 

我到書局買了一個軟墊公文袋($9),把所有文件放入去再到郵局排隊寄空郵+掛號,一共$56.5

 

申請過程:

  • 9/8 (Thur) 15:27 從郵局寄出所有文件
  • 13/8 (Mon) 英國時間 8:40 (香港時間 15:40) 成功派遞
  • 14/8 (Tue) 17:00 下午看的時候仍然是 “Awaiting information from the applicant”
  • 14/8 (Tue) 23:00 status 轉了 “Declaration form received, being processed”
  • 17/8 (Fri) 17:00 status 仍然是 “Declaration form received, being processed”
  • 17/8 (Fri) 18:00 status 變左做 “Dispatched”
  • 18/8 (Sat) 00:20 (英國時間 17:20) 收到DHL的Email表示已從HMPO手上收到文件
  • 20/8 (Mon) 12:50 DHL速遞員將我寄去HMPO嘅文件:舊BNO(已剪角)、出世紙正本、住址證明、父母資料影印本 送到我屋企
  • 22/8 (Wed) 13:10 DHL將我嘅新BNO送到我屋企!

因為我真係好心急,所以我一日會check幾次status.. XD

以上時間無特別註明的話就係香港時間,英國時間的話自行+7小時 (8月份英國是夏令時間,同香港時差7小時)

 

 

中間有一段小插曲,就係原來我申請嘅時候填錯左我手機號碼⋯
仲要係DHL第一次送件黎我屋企嘅時候見到個公文袋背面有我嘅手機號碼,
然後我先發現我填錯左(差一隻字)
因為網上有其他人分享都係話會收到DHL嘅SMS或者電話,
但我兩者都收唔到,原來我填錯電話號碼
好彩咁啱2次DHL送件我都係屋企,無MISS到

 

結果整個申請過程(由寄出文件到收到新BNO)只係需要14日,十分有效率!

希望各位有興趣續領BNO嘅你都可以順利成功續領BNO。

This entry was posted in 其他, 其他 and tagged , , , , . Bookmark the permalink.

4 Responses to 2018 成功續領BNO過程分享 (過期13年,無副簽)
  1. George Yin says:

    1 ) 日本用特區護照, 乜事要簽証,
    2 ) 份FORM雖然有個CHECK LIST 講到出世紙, 但RENEWAL 根本不需要 https://assets.publishing.service.gov.uk/government/uploads/system/uploads/attachment_data/file/564959/OS_Guidance_G3_10.16.pdf
    3 ) PRINT出黎有副署欄, 就應該搵人副署, 佢無叫你後補是你好彩, 所以不應在這教人漏空佢

    • 小水獺 says:

      首先好多謝你嘅留言同意見

      1)因為我是申請working holiday簽證,不是普通旅遊簽證。

      2) 因為我係成年人身份嘅第一本BNO,對上一本已經係兒童BNO,所以填晒所有資料後最後被歸類為 Adult first time,而不是 renewal,而最後下載嘅PDF檔亦會寫你係 Adult first time 定還是 renewal,如果係 renewal 嘅情況就唔需要出世紙,如果係 Adult first time 亦算係 First British Passport,呢個情況就需要出世紙。

      3) 的確PRINT出黎有副署欄, 就應該搵人副署,但我未有認識可以幫我副署嘅人,所以先決定漏空,我亦打算如果對方堅持要求我提交副署,我亦會想辦法睇下有無多年未有聯絡嘅中學老師或其他人幫我副署,最多補交副署時再付一次郵費。我只係打算分享一下我續領BNO嘅經過,比大家一個參考,畢竟每個人嘅情況都唔一樣。我無打算要教其他人漏空,畢竟批唔批新BNO嘅話事權係HMPO手上,要唔要搵人副署亦係自己個人嘅選擇,但如果因此令人誤會副署欄可以漏空的話我亦感到抱歉,我亦會修改一下用詞,希望唔會令大家誤會=]

  2. Xenris says:

    Hello! 我想請問你寄出世紙正本,佢地係咪係寄本新BNO 時回埋俾你啊?我諗緊佢地會唔會唔記得回俾我

    • 小水獺 says:

      你好!
      出世紙正本會連同已剪角嘅舊護照一齊寄回,新護照會遲2日先到。
      因為我見佢話到提供出世紙但冇話係copy,所以我估佢應該係要正本,網上有其他人分享用出世紙副本都可以成功續領,如果唔放心寄正本可以試下寄副本。

Comments are closed.