曾經樓上cafe文化超熱, 但令我更深刻印象嘅係。。。 大部分呢啲cafe都係提供。。 是但溝兩溝嘅飲品, 加碟焗爐焗一陣嘅腸仔魚旦之類, 真心聞風喪膽。。 直至我搵到呢一間 #隱世樓上cafe 只 zi , 我終於改觀了! 環境充滿vintage式田園風 , 乾花處處 , 仲有花蝴蝶主題牆 而佢哋嘅嘢食唔單止用心配搭, 充滿創意, 而且 #真心 質素水準以上, 連擺盤都好有誠意。。。。。 係間舖嘅地址難搵啲囉。 日式煎封挪威刺身級三文魚排配蒜香豆醬 $198 一見到個名我就想試, 因為我真係好鍾意食半生熟三文魚! 煎到外皮香脆,內層juicy,口感層次分別。 最特別係用咗蒜香豆醬, 味道十分似中式豆豉, 但估唔到呢種鹹香, 正正可以帶出三文魚嘅鮮味。 林太表示十分回味! 黑松露薯條 $60 看似普通嘅一道小食, 香脆嘅薯條灑滿黑松露粉, 配上自家製黑松露蛋黃醬, 立即將味道層次大大提升! 焗芝士鮮茄醬雞肉肉丸 $65 香嫩雞肉丸配上番茄醬芝士, 拉絲果下真係好爽! 欣賞呢個蕃茄醬有粒粒蕃茄肉, 帶點酸酸甜甜嘅感覺, 真係唔同現成番茄醬嘅! 蝶豆花紅莓蜜桃果梳打 $58 顏色超靚嘅飲品, 濃香果甜混合淡淡花香, 加上 有氣效果,入口清新又清爽! 燒棉花糖鮮奶焙茶 $58 茶味奶味恰到好處, 奶泡幼滑細緻 , 再加上香軟燒棉花糖, 賣相同口感都係水準之上, 而我就最鍾意佢剛剛好嘅入口溫度喇! 自家製玫瑰草莓醬窩夫配焦糖冰淇淋 $76 竹炭窩夫外層香脆內層鬆軟, 配上酸酸甜甜帶花香嘅玫瑰草莓醬, 味道清新簡約, 如果配埋焦糖雪糕一齊食, 就會多一份甜香, 兩種食法各有喜愛! ※後記※ 樓上咖啡店比較少提供手沖咖啡, 仲有兩款咖啡豆選擇,真心想試, 可惜今日我哋蕩失路搵唔到,搞到遲咗入座, 想嗌嘅時候已經冇曬喇, 唯有等下次機會啦,我哋會再嚟嘅! 只zi cafe 尖沙咀 加連威老道66至76號 威華大廈4樓402室