最近忙住裝修屋企,成屋傢私電器樣樣都要買.....加加埋埋條數都好誇張,所以慳得一蚊得一蚊....平時拍拖就行下D家電,得閒又上網搵下資料,到真係要買果時就知有冇買貴左!!未來屋企要換3部掛牆分體式冷氣,真係唔睇唔知價...原來分體式冷氣係咁貴!!!!!! 先講裝機 通常你去冷氣舖問價,佢一定會問埋你要唔要裝埋,如果要既....佢要約時間上泥睇位,睇位費通常$100-300不等,一般都可以係訂單減番。我記得豐X睇位好似唔洗錢,我強烈建議你地約時間睇左位先,大約知道個價同有咩加錢項目,就算係裝工價錢都可以差好遠!!!!當然裝冷氣最好搵D信得過既師傅...因為冷氣裝得唔好手尾會好長。一般裝工師傅會睇你屋企環境先報價,基本安裝包括:雪種喉+去水喉及電線+包邊膠,大約2-3千蚊不等(要視乎你買幾多匹),而拆及搬走舊冷氣/加長喉/做暗喉/加鋁架/改穌位/加電位/塔棚......全部另外加錢,淨係塔個8尺棚最少要$2500起....所以好多人都話裝機係貴過買機。 冷氣機款 家用分體冷氣有種叫窗口分體 ,其實係指你屋企窗口出面已經有個冷氣機位(如圖下),可以放個室外機,咁你就可以揀室外機高度420mm 既機種,咁樣裝工費相對會平好多! 。 由於我地全屋裝修,冷氣會俾師傅安裝,所以我今次淨係問單買機價。但冷氣一定一定要格多幾間價!!!!!!因為價錢可以差好遠好遠.....而我老公指定冷氣一定要用大金,話個裝工點都要咁多錢買就買個好D既......,其實唔同牌子既冷氣價錢都差好遠,較平可以揀格力/開利 /美的; 貴可以揀大金/三菱電機/東芝。 揀冷氣首先要問自己.... 1. 要買幾匹? 客廳或房間的面積愈大,就需要愈大匹數的冷氣機。50呎至100呎的房間約需要一部3/4匹的冷氣機,至於200呎的客廳就需要1匹至1.5匹的冷氣。如果整個廳面積達700呎,又或者是飯廳連開放式廚房,就可能需要2匹的冷氣機。 同環境需要的冷氣匹數有所不同,例如一個經常西斜,或者位處高層、四周沒有建築物遮擋的單位,由於經常受陽光照射,加上石屎牆身吸熱,所需的冷氣匹數亦可能比一般單位較高,因此挑選冷氣機前亦需考慮這些因素。 (source: Topick) 2. 要唔要變頻? 變頻可以簡單理解為較慳電指標,多數變頻冷氣都可乎合1級能源效益。 3.要唔要冷暖? 現時好多冷氣機都有冷暖功能,一部機就令全屋冬暖下涼! 大金冷氣 我睇大金冷氣先去聯X同專門店,貪佢地好似PRO D.....但事實上佢地抱住唔憂做既態度係唔會SO你....我唯有上網自己了解下。2018家用機通常你會見倒R32 同 R410 既機....其實係講緊佢個雪種分別,R32係大金自己新出既雪種....聽講會更慳電更涼快...但始終佢係輕度易燃,加上價錢較貴...我都係選擇用傳統R410雪種。附上Catalog俾大家參考R32 Ururu Sarara 7 加濕除濕多功能變頻冷暖掛牆分體機R32家用分體機系列 R410A家用分體機系列 R32 Sarara7 > R32>R410冷暖>R410淨冷 (型號推出次序左至右,當然愈新型號價錢愈貴) 決定左要R410既雪種就可以揀型號。首先我要揀2匹同1匹冷氣,之前講過有種窗口分體個室外機身比較細,可以放係窗台位置,可以揀420系列.....所以我揀左房用FTWX25A (25A係個匹數, 25A=1匹, 35A=1.5匹) 而廳我用淨冷就可以,雖然冷暖只相差幾百蚊....但廳有暖爐冇需要用。 我問左好多間,所有人都話大金之後會加價....要買快D買.....就算唔理佢加價,夏天一到就好多人搶機....到時你想買都買唔倒...最終琴日買左今日就送到XD 好高效率!!!! 裝左再同大家分享用後感~最後.....係邊買先較平呢??? 同一部機....平同貴果間可以差成千蚊部.....真係差好好好好遠!!!!!!!!!!!如果想知係邊買,請INBOX =]