第一次帶bb去游水執袋list + 小貼士

夏天同小朋友最好消暑活動,其中一樣肯定係游水!放電一流,而且又舒服!不過第一次同bb去游水,難免都會有啲緊張,好怕帶漏野,今次同大家分享一個超輕便嘅執袋list!

1. 泳衣

如果係係屋企附近泳,建議可以換左泳衣先,唔洗去到更衣室先換

2. 便攜嘅沐浴露 + body lotion

好多時游完水,bb皮膚都會好乾,因為泳池水有氯氣,所以每一次游完水最好都要幫佢哋搽cream

3. 游泳片

為咗保障其他小朋友同泳池清潔,一定一定要幫小朋友帶游泳片,一般嘅尿片做唔到防水功能,所以一定要買游水專用嘅片比佢哋!


(大家可以選擇買環保泳片,慳返好多錢同埋環保啲!)

4. 大毛巾

每次上水嘅時候,都會比較凍,一定要帶定毛巾包住小朋友,以免冷親!如果你覺得包完泳池嘅水,再抹身好污糟,你就需要帶兩條毛巾喇!

5.水泡

始終小朋友第一次游水,戴定個水泡比佢哋會穩陣啲,不過我個女都好唔鍾意水泡嗰種束縛,好多時最後都會變咗唔用,但係第一次去游水,建議都係帶咗先!

6. 防曬(可選擇屋企搽左先)

同小朋友去戶外玩,一定要準備防曬,以免佢哋嘅肌膚受到紫外線嘅傷害!

小貼士:

– 如果驚水嘅小朋友,可以先同佢係比較淺水嘅泳池邊坐一陣,踢下水,等佢哋習慣一下先再慢慢落水玩。

– 盡量揀返適合小朋友玩嘅泳池,例如彩虹游泳池、九龍仔公園泳池、堅尼地城泳池、西灣河等,都有好多玩樂設施,非常適合bb&小朋友玩!

– 準備定BB拖鞋,因為沖涼嘅時候地下都會比較濕,容易「冼」親,建議可以比BB着定,沖涼嗰陣出返去都冇咁易仆親。

– 注意洗池同開放時間

– 最好係朝早10點至11點、或者晏晝3點後游水會最好,唔會太曬,水溫亦都唔會太凍!

– 希望大家呢個夏天可以同小朋友盡情去泳池放電啦!

鍾意我嘅分享可以Like我地Facebook同IG比個支持我!會更快知道我既Update架!
Facebook:https://www.facebook.com/90sMummy/
Instagram: https://www.instagram.com/minarainlo/

This entry was posted in 其他, 好去處 and tagged , , , , . Bookmark the permalink.