下城門水塘行山 由沙田行到荃灣

我覺得二十幾歲人仲要依賴交通工具真係好可憐,所以我決定由沙田大圍行到荃灣!!

難度:1.5星(5星最高)
距離:7公里
時間:3小時(邊行邊影)
起點:大圍火車站

終點:安蔭或菠蘿壩

Garnin突然share唔到圖,我唯有cap圖啦…
https://connect.garmin.com/course/embed/11951667

經下城門水塘到荃灣,係一條都幾冷門既路線。以前下城門水塘有著名嘅“鐵索迷城”,好多人去挑戰,不過後來比人拆左,好多遠足隊都少左去。

呢條路線難度唔算太高,前半段都係石屎路,後半段繞落谷底之後,路線會有少少唔清楚,唔好行錯,響呢個山谷迷路都幾煩下。

路線有兩大特色,一係會經過城門隧道行車天橋;二係最尾可以近距離接觸水壩仲要行好長好長樓梯上去。可以影相嘅位置好多,不過我去既時候天氣好差,所以影嘅相好普通,你哋加油影啲靚相。

由大圍火車站E/D出口出發,沿積運街上山,你首先會見到沙田茵餐廳。

沙田茵餐廳係沙田其中一間歷史最悠久嘅餐廳 ,亦都係以前好多粵語片嘅取景地點。有興趣可以睇下
http://pc633hk2047.pixnet.net/blog/post/158156537-沙田茵餐廳-shatin-inn

過左沙田茵餐廳就會去到大圍新村迴旋處,呢度要換下城門道繼續上。下城門道真係幾斜下,行到尾就係寶福山。有部份人可能留意到喇,你其實係可以用64K號小巴skip左呢段路佢。

經過寶福山之後繼續沿下城門道上,經過兩個180度大彎之後,就會黎到下城門水塘主壩。

下城門水塘的主壩係沙田一帶的“飛機場”,各位搖控發燒友都會黎呢度放飛機。而下城門水塘身處既呢一條巨型既山谷就係城門峽,一陣越行入去就會越窄同越高。水塘嘅水就係來自峽谷兩邊既溪同城門水塘嘅排洪管道,然後水會直接流入沙田濾水廠供應沙田居民用,多餘既就會排入主壩下面嘅城門河。(你以為點解城門河叫城門河?)

 

岩喇,你依家可能會意識到,其實呢條路線落雨係絕對唔可以行,因為會通過峽谷既底部,只要一有山洪暴,或者城門水塘排洪,你就死硬架喇。

睇完主壩風景就可以繼續行,行到主壩另一面,轉左,入水務通道。呢一段都係石屎路,唔難行。行行下就會見到城門隧道個兩條行車天橋(我打到呢度既時候正正搭車經過緊條橋)。

WoW,其實我從來未試過咁近呢兩條橋。向橋上面經過之後,你就會見到一條向下好斜既斜路,岩架喇,行落去啦。然後你會遇到個U turn,最後黎到天橋正下面嘅一塊空地。

其實都幾嘈,條橋上面仲有喇叭,你有機會聽到廣播。

 

旁邊有條輸水管道。行呢度過去會有條樓梯,可以直上孖指徑,不過今日唔行呢度。

影完相之後就要過全程最恐怖嘅鐵橋……與其話係鐵橋,不如話係鐵網橋,因為條橋係可以直望到底……

好鬼高……

小弟怕高,我向上望咁極速行過左條橋就算。記得唔好行太快,因為條橋好震。

過左橋轉右,呢度嘅路有啲唔清晰,因為係響草叢入面行,不過唔駛擔心嘅,你只要右轉就應該會搵到條水務署維修通道。

行多十五分鐘左右,就會見到城門水塘主壩,恭喜你,本路線最大既挑戰黎喇,就係要登上城門水塘主壩。

高到呢……

首先你要搵到路上去主壩先,最安全嘅方法係過一過河,去到水壩最右邊,會有條小路上;或者你可以好似我咁爬鐵梯上,大概5~6米高,爬到腳仔軟。

成功上到主壩最底層之後,就可以開始行呢4百級樓梯。城門水塘主壩高275英呎,接近一百米高,呢一段樓梯完全可以令你質疑自己做咩要咁屎忽癢黎行山。

大概行十分鐘就會到主壩頂(加埋你頂唔順要休息嘅時間),之後就會見到城門水塘喇~當然攰到死係唔會有興奮既感覺。

到頂轉左,沿城門水塘條大路行就會去到菠蘿壩小巴站,有82號小巴出川龍街。

不過架小巴成日都好多人排隊搭,我一般都會沿水塘邊嘅小徑落山。今次我就係沿城門村落安蔭離開。

中間會經過廢屋

仲有個廟仔

之後就會到安蔭
 
不過呢條唔係咩主要路線, 怕你地迷路就唔介紹喇~

交通資訊

64K小巴 富山 – 大圍站

82小巴 荃灣兆和街 – 城門水塘

This entry was posted in 香港 and tagged , , , , , , , , , , . Bookmark the permalink.

One Response to 下城門水塘行山 由沙田行到荃灣
  1. Tom must says:

    您好!請恕冒昧打擾,我見到您提供的大圍至荃灣路線,我想請問若我反轉由安蔭行至大圍可行嗎?有沒有另外要注意的地方,謝謝您!

Comments are closed.