九千蚊玩盡赫爾辛基+塔林+聖彼得堡 (食、住、行、玩、買全攻略) – 第一章

相信大家同我一樣作為一個香港嘅普通打工仔,Annual Leave 呢樣野對我哋嚟講絕對係「彌足珍貴」。等我同大家分享一吓我點用9日(請5日AL加4日Weekend)同大概9千港幣去完成一趟穿越三個國家(芬蘭 – 赫爾辛基、愛沙尼亞 – 塔林同俄羅斯 – 聖彼得堡)嘅北歐出走之旅!

我嘅行程、住宿、交通、必買手信同必試餐廳都會係下面Share俾大家。希望跟住落嚟嘅資訊可以幫到手啦!

今次嘅旅程雖然係要去3個唔同嘅國家,不過佢地嘅距離都唔算好遠,所以比起其他歐洲之旅,呢個行程用係交通上嘅時間同複雜程度相對簡單。加上佢哋各有歷史文化背景同建築特色,所以三個地方有唔同玩法,不過最重要嘅係三個地方都好易玩,景點好集中同埋影相打卡位完全無得輸。

*順帶一提,去呢三個地方香港護照都係免簽證㗎,所以唔使擔心!

首先分享下呢9日嘅行程先,詳情就喺下面個表list咗出嚟,自己慢慢參考吓啦!

↓↓↓俾埋個Google Map圖等大家有個概念個trip係去邊度↓↓↓

機票攻略

講到明九千蚊要玩曬成個trip,機票價格當然唔可以貴啦!相信去開旅行嘅大家都知中東三寶飛歐洲成日都可以做到4千蚊內連稅,但係代價就係要花大半日轉機。不過今次我竟然可以係出發前3個星期前係 Trip.com上面買到張4千蚊連稅香港直航赫爾辛基同Open Jaw聖彼得堡回程嘅機票。(不過有時Finnair做特價嘅時候,有機會買到張3千7蚊嘅機票,所以買機票前記住格下價先!)

我今次就揀咗星期六朝早9:10班機,唔講你哋可能唔知,其實香港直航去赫爾辛基只係需要大概9個鐘嘅時間,所以我係香港朝頭早上機,下晝2點幾就會去到芬蘭㗎啦!如果大家想Chur啲嘅話,你更加可以選擇星期六凌晨12點9班機添。

座位整體都幾寬闊,leg room 都唔錯,有USB叉電插頭,不過提供選擇嘅戲就唔算太Update。飛機餐味道不過不失,有7/10分(去程港式,回程北歐風味)。

赫爾辛基機場出市區

由赫爾辛基嘅萬塔機場會去市中心嘅中央車站,有三種主要選擇,包括火車、巴士同Finnair營運嘅機場巴士三種交通工具為主。我就揀咗最平嘅巴士(615號)出市區,去市區大概少於一個鐘頭,同另外兩個選擇其實唔差太多時間。大家記住去自動售票機買咗Single Ticket先好上車呀,至於車錢方面就係4.6歐,因為部機只係支援散銀,所以我建議大家用信用卡俾錢會快好多!

↓↓↓售票機、巴士外型同埋終點站個樣↓↓↓

酒店

去到中央車站之後,我就即刻搭咗兩個地鐡站 (Ruoholahti Metro Station) 去酒店啦!(係赫爾辛基點搭交通工具會係下一章話你知)

頭兩晩酒店我就揀咗喺市中心邊緣嘅 Holiday Inn Helsinki West- Ruoholahti ,酒店價錢大概係$500一晚(連稅唔包早餐),點解要揀呢間酒店?係因為佢好近我第二日要去塔林嘅碼頭,同埋佢係一間國際品牌-IHG旗下嘅四星酒店酒店,質素絕對有保證。加上酒店附近有一間24小時嘅超級市場同免費桑拿,所以我都覺得酒店整體都幾OK。

不過如果大家都覺得呢間酒店out budget 嘅話,下一篇文章我會同大家介紹一間係赫爾辛基平靚正嘅hostel。

↓↓↓有片有真相,睇吓間房啱唔啱心水!↓↓↓

遊赫爾辛基初體驗

酒店check完in同去完超市之後(大概6pm),我就由酒店出發行咗大概20分鐘去到市中心,真真正正開始今次嘅旅程。第一晚行程主要係去咗中央車站、靜默教堂同市中心慢慢遊走影吓相。因為要凖備第2日去塔林嘅旅程,所以行到9點左右就返咗酒店焗桑拿同休息。

D2 – 愛上.愛沙尼亞(塔林)

行程嚟到第二日,我會搭兩個半鐘嘅郵輪喺赫爾辛基出發去橫越波羅的海去到對面岸嘅愛沙尼亞首都塔林。因為我住嘅酒店距離碼頭只係需要大概20-25分鐘嘅路程,所以嗰朝早我7點9開始出發行去碼頭撘9點班船。(建議大家早半個鐘頭到達碼頭預時間拎船飛)

↓↓↓沿途充滿北歐氣息嘅清晨

開船之前,講下點樣買船飛!經一輪格價之後,我發覺喺KLOOK 上面買船飛係最平嘅(即日來回只係HK$168),加上攞住個Apps裏面個booking就可以去碼頭換飛,真心覺得幾方便!同時建議大家Book 埋回程時候嘅Dinner Buffet,因為差唔多平成HK$70 㗎,Buffet食評,講到回程嘅時候話你聽。

↓↓↓下面就係買船飛嘅資料,更多詳盡資料就click 入 –> KLOOK 啦!

去塔林嘅郵輪上面有Cafe、cafeteria、老虎機、酒吧+表演同超市添,所以上咗船之後一啲都唔會覺得悶㗎!

飲下咖啡…聽下歌…睇住過海,唔經唔覺兩個半鐘頭之後就去到塔林碼頭。大家落咗船之後,向着前面個尖塔方向一直行15分鐘左右就去到最主要嘅景點「塔林古城」,開始塔林嘅行程。

好!睇到嚟呢度,到底你知唔知塔林係咩地方嚟?

塔林係愛沙尼亞共和國嘅首都。係北歐地區保存最完善嘅中古世紀城市,呢個城市曾經被丹麥佔領塔林過超過一百年,之後佢又分別被瑞典同蘇俄統治過。而塔林嘅主要景點幾乎全部都集中係保留中世紀原貌同氣息嘅舊城區裡。1997年佢更列為世界遺產添。

其實嚟塔林玩唔洗做太多凖備,係呢個中世紀古城區隨心而行慢慢就會去到景點。

必必必到景點

  • 古城城門 – Viru Gate
  • 亞歷山大涅夫斯基教堂
  • 市政廳廣場
  • 帕特庫利觀景台 (影塔林古城全景必去)
  • 丹麥國王廣場

去曬大部分景點都差唔多成4點,係時候要搵個地方休息吓。所以我去咗塔林最歷史悠久嘅咖啡店 – Maiasmokk Cafe 嘆咗個 Afternoon Tea。Order 咗杯Cappuccino加個Tiramisu 大(概HK$70左右),其實間餐廳淨係食個環境我都已經覺得抵返晒!

最後hea到5點3左右,係時候完結塔林嘅行程,行返去碼頭搭6點班船返赫爾辛基。不過上船之前,我建議大家可以去碼頭前面嘅一間超級市場買塔林手信,因為真係平啲㗎!

買完手信之後,我就準時6點上返船回程芬蘭!係呢次嘅船程,我就試咗個Dinner Buffet,個buffet都算幾多嘢食,頭盤方面有蝦、三文魚、魚子醬、多種火腿同芝士,熱盤有牛扒、三文魚扒、北歐肉丸、雞同腸仔等等,甜品選擇都可以接受,有基本蛋糕同雪糕等等。不過,我覺得最加分嘅係紅白餐酒任飲!以整體來講,我覺得個buffet有8/10分,因為整體味道係OK嘅,加上二百幾蚊港幣嘅價錢係出名高消費嘅北歐國家來嚟講算係超抵食!

兩個半鐘頭嘅船程之後我又再一次回到最初的起點- 赫爾辛基,繼續我喺芬蘭嘅行程。

想知我跟住落嚟喺赫爾辛基同聖彼得堡嘅行程,就要留意住我嚟緊嘅兩篇Blog啦!

待續……

我IG Story 有齊今次行程嘅紀錄,想睇多啲就要Click入 –> https://www.instagram.com/manwick

This entry was posted in 住宿, 俄羅斯, 其他, 外遊美食, 愛沙尼亞, 文化遺產, 芬蘭, 觀光, 酒店 / 度假村 and tagged , , , , , , , , , , , , , . Bookmark the permalink.