[速報]聖誕元旦好去處!廠商會第53屆工展會2018|文迪.漫遊.慢生活|

工展會在本地經歷咗好多個年頭,但原來不經不覺今屆工展會已經踏入80周年!今年的陣容一如以往的強大,超過880個中外品牌的展銷攤位,唔知當年今日嘅工展會盛況會係點嘅呢?

更多的旅遊、飲食、分享,可加入文迪.漫遊.慢生活的專頁:


在工展會首日做第一批入場市民 ,今早入場已經人山人海咁。原來每日首800名購票入場人士均可獲禮品, 當然我一定唔夠人哋咁醒目早就霸定頭位了, 不過仍然有大量超值價的福袋同埋各種購物優惠, 唔洗同人爭。

今朝太早起身本來有啲眼瞓,但場內有好多咖啡試飲即時醒神曬! 本身就係咖啡迷, 本地咖啡自然非常鍾意,不過今日飲到的馬來西亞同越南咖啡都唔錯。

先睇睇工展會的單位平面圖,主要分為香港名牌廣場區、食品飲料區、 糧油麵食區、參茸海味區、生活家居區、美食廣場區等,就算是走馬看花都要用半天先行得完。

好多熟口熟面嘅香港品牌,例如由細識到大嘅時興隆、阿波羅鮮果甜乳酪……

吉野家竟然推出即食牛肉飯,會場價20元一盒,試食過味道還原度超高,所以都幾受歡迎。

當然唔少得大熱的零食!魚皮除咗咸蛋味仲有其他口味的,台灣食品的展銷攤位唔少,有度小月、關廟日曬麵、太陽餅,我最喜歡的老媽拌麵更有會場限定的囗味。

北海道大粒帶子、急凍生蠔、海參鮑魚、一口和牛、糧油雜貨……媽媽級見到一定為之興奮!

家電品牌有唔少展銷攤,唔一定係大型家電,近來流行的小型家電都好受歡迎。

注意會場入面唔係樣樣都超平,當然首日的$80福袋最抵的,個人心得係鎖定喜歡的品牌,要帶多D搬運工人來掃貨,或者專攻市面少見的品牌,要理智消費呀!

搬運工人唔夠多的話, 入場食嘢其實都好開心! 場內美食廣場有十幾個熟食攤位, 無論係飲嘅食嘅都好多選擇!

先飲一杯金茶王的奶茶,茶味超濃又唔會太甜, 最緊要夠冰凍因為今日實在太熱!

莎莎餐廳的美食攤位主要賣港式美食, 蘿蔔牛雜簡直係香港街頭美食嘅代表, 會場價40 蚊味道正常吧,雖然唔算好平但唔過份囉!仲有大粒魚蛋、魚翅、台式蚵仔麵、德國腸豬手同埋南非炆鮑魚等等,要掃街吃得飽飽的絕無難度。

場內仲有好多美食攤位,如長洲糯米糍、港式街頭美食、 泰式船麵、 車仔麵、 雪糕、甜品、蛋糕、飲品,選擇都幾多,好似去咗美食博覽咁!

今年是我第一次逛工展會, 只入場一次實在是買不夠, 不過票價才不過十二元, 反正就快聖誕和元旦假期, 下次帶埋家人一起來掃貨吧!

***

【廠商會第53屆工展會】

日期:2018年12月15日至2019年1月7日

時間: 上午11時至晚上10時

地點: 銅鑼灣維多利亞公園

票價: 港幣十二元

官方網站:http://www.hkbpe.com.hk/

***

更多飲食、旅遊的博文,可加入我的專頁

This entry was posted in 消閒, 特色餐廳, 香港 and tagged , , , , . Bookmark the permalink.