雖然住元朗,但元朗真係太大啦,好多地方都未去過,見假期就約朋友去錦田食個靚brunch,然後去大生圍影"天空之鏡"! . 黎左天空之城入面嘅呢間Crazy February(地址:元朗錦田高埔村映堤105號地舖),個芝士牛肉漢堡上枱時真係嚇親我,因為真係勁大份!配菜有得揀薯條,但我轉佐有機沙律,的確又新鮮又爽甜,唯一係個漢堡扒就質素一般。 個set $78包埋餐湯、蒜蓉包同飲品,都算抵食。喺度食野真係好悠閒,不過這間小店生意好旺,假日人流不斷,我哋1PM去到都要等30min先有位坐,之後keep住到有人嚟,走嘅時候見到好多人嚟食窩夫,個樣好吸引咁呀。 . 前往方法: 1. 自駕的話,餐廳出面有得泊車。 2. 元朗搭64K/54,高埔村站落車 3. 西鐵到錦上路站,轉小巴去爾巒或者任何經高埔村站的巴士 食完野之後我哋就行路出返大馬路搭78小巴去大生圍,小巴班次好頻密,喺錦繡花園落車再行路20分鐘就到。 大生圍係一個好靚好寧靜嘅漁村,仍然好純樸,遊客唔多。其實嚟主要係因為新假期介紹過呢度有『天空之鏡』,但係村民完全唔知自己條村有啲咁嘅嘢,好搞笑! 啲屋都比較舊式,其實居民主要係啲公公婆婆,見到佢哋好休閒咁坐係出面納涼,或者和左鄰右里傾下計,生活都幾寫意。不過嚟呢度真係要靜心欣賞,唔好打攪佢哋寧靜嘅生活。 我哋周圍咁行,終於係一個池塘度見到『天空之鏡』!藍天白雲,啲相點影都靚! 第一次睇人捉泥猛!啲泥猛係咁跳下跳下,場面有趣! 仲有羊仔添! 聽講黃昏的天空之鏡,份外動人,可惜朋友需要趕回九龍,今次無緣睇到。最後返去大生圍村村公所搭返36 號小巴返元朗市中心,大約15分鐘就返到!