自從健康美成為潮流後,個個要練大隻練肌肉就衝去食雞胸,但係雞胸出晒名嚡,成舊煲湯瘦肉咁,點捱呀大佬!利用中菜同阿媽既智慧,只要記住呢3個秘訣,煮出黎既雞胸一定一定一定唔會嚡! 呢三個秘訣都係以鎖住肉汁為目標,咁樣舊雞胸就唔會乾柴。 1. 醃雞 無論你想整咩汁,豉油、蝦醬、黑醋、香草醬都好,千萬唔好第一樣調味料就落鹽!因為鹽會「哪」到舊肉實晒,神仙都難救。 因應返自己既需要同要煮既汁,有三樣野,一定要是但落一樣去鎖住/滋潤/補充肉汁,你實估到,就係生粉/油/熟水 落生粉同油既原理唔難明,我就唔係到講。但係熟水,其實係會俾生肉吸收左,到煮既時候,一定會流失左d肉汁,當你落左熟水醃,第一時間會流走既就係本身俾舊肉吸收左既熟水,因而保留返原本既水分,避免煮到乾爭爭 2. 幾時落鑊煮 絕對萬萬不能求其開左火就落鑊煮!!!! 要鎖住肉汁,一定係熱鑊冷油再落肉,點知夠唔夠熱?最簡單就係放一舊肉落去,聽到滋滋咋咋聲就代表夠熱,未聽到?等多陣先落肉啦 原理係生肉一接觸到高溫就會極速煮熟表面,咁樣就好似封左道門咁樣,流失肉汁既速度就會減慢 3. 煮幾耐 煎封兩面之後就要轉細火加蓋焗。因爲長期大火煮係會煮到個質地裡外不一。細火焗就可以令熱力均勻滲入每一舊肉入面,煮得熟又唔會乾。咁焗幾耐呢?大概5分鐘倒,但每一個爐既火力都唔同,另一個指標就係,當你見到鑊入面既水分比你加蓋之前多左,你就可以試下用鑊鏟或者筷子,搵一舊大少少既肉試下切落去,如果輕鬆一切就開,咁就代表熟晒,拿拿林上碟,唔好俾個鑊既餘溫再繼續煮肉啦 去睇下切開有幾JUICY: https://www.facebook.com/malucfooddiary/videos/471273293324950/ Follow me on Facebook: https://www.facebook.com/malucfooddiary/