[正宗意大利風味] 芝士團子配煙肉蕃茄

芝士團子呢個名堂係我純根據成分亂作出黎,正名係Malfatti,係意大利出生,意思大概係「求其整」。佢係一種主要用芝士同麵粉整成既既小丸子,有少少似薯仔粉團Gnocchi,食落軟糯而富芝士香,配住呢個煙肉蕃茄汁,酸酸地又有煙肉既香氣,將呢個芝士團子既美味無限放大!好易整架咋!
材料 [3-4人份]
中筋麵粉 1/2杯 (另外預留麵粉搓麵團用)
Ricotta芝士 250克
蛋,室溫 1隻
巴馬臣芝士碎 100克 (另加少量最後加係面)
鹽 1茶匙
煙肉(Pancetta),切條 100克
車厘茄 200克 (可將部分切半,靚D又容易入味D)
新鮮羅勒葉,撕碎 2-3束 (可略)
 
做法
1. 係一個乾淨既平面灑滿薄薄一層麵粉 (可以係砧板或者焗盤之類),待用。用一塊乾淨布 (麻布或者cheesecloth更好)包住Ricotta扭乾水分,再用廚房紙抹乾表面 (要盡量減少水分,如果唔係一陣會搓唔成粉團)
 
2. 將所有芝士、蛋同鹽攪勻,再篩入麵粉,攪拌至岩岩勻晒 (攪過龍會影響口感)。
3. 將麵團倒放到另一個灑滿麵粉既平面上(灑麵粉以防黐住平面),分成4份,逐份搓成約1.5厘米既長條,再切成約1.5厘米闊既小團子,放係第1步預備左既平面上

4. 中火煎煙肉至金黃同脆身待用;同步煲水至小滾煮團子(小滾即係見小泡泡升上黎而唔係爆晒泡咁樣),煮至團子脹大浮面(約3-4分鐘),熄火
 
5. 用頭先煎煙肉個鑊,加入團子、車厘茄同90毫升煮團子既水,開中大火,輕輕攪拌至醬汁變稠(見到團子黐左層汁就可以),熄火落鹽同黑椒調味
6. 上碟,羅勒葉、煙肉同巴馬臣芝士碎灑面,食得啦!
This entry was posted in 個人, 其他歐洲菜, 家居, 家常小菜, 家庭聚會, 情侶約會, 意大利, 意大利菜, 時令, 活動, 消閒, 生日派對, 知己聚會, 知識, 社交, 節日, 美國菜, 興趣, 親子, 食材 and tagged , , , , , , . Bookmark the permalink.