都唔知幾多年冇同閨蜜撐枱腳!正因閨蜜已經蜜到做左我阿媽個契女。所以每次食飯都變左家庭聚會。小囡出世後,更加冇機會同佢2個撐枱腳啦! 今日難得 #拋夫棄女,當然要食好啲,食蠔啲啦! 經打探之下我搵到呢間隱世好餐廳! 誇張左啲,其實係位於銅鑼灣鬧市。交通方便。只係門口唔起眼,真係熟客先識嚟! 呢間環境好、食物好,服務更加好! 經理超級細心又有型!仲好浪漫,會為每枱客人度身訂造一個浪漫回憶...係咩?次次有驚喜。自己去感受下啦! 講返食物,呢度最出名就係 #新鮮生蠔,其實我喺香港好少食生蠔,好難搵到真正 《新鮮生蠔》,呢度啲生蠔鮮生味十足!喺香港少有食到咁原汁原味嘅生蠔! Namibia 極度肥美,非常鮮甜,完全冇腥味! Mermaid 海水味較濃,蠔味較濃,鮮味十足! 因為實在太鮮甜,我一點醬汁都唔洗加!連檸檬汁都唔洗。原汁原味。問左佢地解可以比出面好食咁多!原來佢地有專業技術,開得好,冇殘留蠔殻,所以唔洗沖水。亦減低二次污染風險!講真,真係難得食到咁鮮甜嘅生蠔。閒日仲要買一送一,抵過自己訂啦!蝦同螺都非常大隻鮮甜。重點係:冇!雪!味!以為自己又去左日本...(閉上眼食都呃到自己㗎!) 配埋呢款餐酒,啱晒我地女仔飲,甜甜地易入口。令人唔小心一口接一口...唔好醉呀⋯⋯ 我地叫左2款餐湯 招牌蠔湯同龍蝦湯。 有驚喜!蠔湯蠔味好濃,好似成碗都用蠔肉打出嚟咁,裡面放左一隻煎過嘅蠔。真材實料 龍蝦湯非常鮮味,有別一般龍蝦濃湯,呢度冇咁杰,冇乜忌廉,龍蝦味極度濃郁。精彩! 呢度連個蒜蓉包都特別好食,蒜蓉香濃,個多士仲脆卜卜。好好食! 主菜係Barramundi, 澳洲鱸魚。皮脆肉嫩。咁厚肉都煎得好均勻。唔會外面過火裡面太生。非常鮮甜。 連個伴碟嘅薯蓉都做得好幼滑。夠誠意! 食飽飽到主角出場!嘩嘩嘩....嘩嘩! 太靚喇! 經理以朱古力同果醬人手畫嘅玫瑰花,華麗,精彩!細緻到連刺都畫埋出嚟!靚到唔捨得食。影左無數咁多張相都覺得唔夠實物靚! 個梨批即時變左配角咁。哈哈!但其實個批都好好食㗎!批皮好香牛油味,加上外層嘅糖漿,令個批皮更香口。平時我好怕啲梨焗到爛晒。呢度就唔會,入味得嚟唔會太淋,好好味呀⋯ 閨蜜已經book左位下次帶男朋友嚟食飯浪漫下...提提大家,記得做埋會員,少少資料簡單like page。今餐嘅 Charge 可以當現金積分。儲儲埋埋有得食免費餐。 真心誠意推介!鐘意食蠔嘅朋友千萬唔好錯過!多謝有型經理果幅咁有心思嘅「名畫」! 酒店內高級餐廳,一級水準 地址: 銅鑼灣邊寧頓街13-15號隆堡柏寧頓酒店三樓 網址: https://s.openrice.com/QrbS0D5a200 #食得嘅名畫 #蠔迷必到 #浪漫晚餐