呢間餐廳有辦法令雷囡s全程乖乖唔騷擾我,給我一餐舒適的安樂茶飯!優雅地吃一頓飯(唔容易) 前幾日大年初七人日,我地全家搵個藉口去左石門食好野。慶祝 #雷大囡生日+ #人日+預祝 #情人節...九萬幾個借口。 有小朋友之後都冇乜慶祝情人節,情人節總想食西餐,但帶小朋友去食西餐真係好多時都好尷尬。 而且有啲餐廳仲唔係好歡迎小朋友,連bb凳都冇張....所以冇乜慶祝情人節! 之前見朋友去石門呢間 Su Casa 話啲扒同蠔都好正,而且仲有 #兒童餐,唔洗煩雷囡s冇野食。即時book位試下。 地方環境唔錯,浪漫得嚟又唔會太黑。啱晒我地呢啲一家大細(小朋友唔鐘意太黑)。 我好欣賞佢地勁貼心,第一時間俾畫筆同埋填色紙雷小囡,#killtime 必備! 令我有餐安樂茶飯食,好滾動。 除左填色紙外,兒童餐張餐牌都有野玩,啱晒雷大囡。佢超鐘意,即時玩個數讀 (我冇睇啱唔啱,見到已暈左) 環境服務都好好,啲野食仲好得,真係要讚下! 《香煎鵝肝配多士》 鵝肝煎得好香但又唔油膩!而且好厚身,剛熟唔過火。真係好好食!估佢唔到 《蠔湯》 餐牌推介,而且蠔湯真係好少見,當然要試啦。有驚喜! 蠔味好濃又唔腥,飲得出好新鮮,連老公都話好正! 《煎蠔肉黑松露雜菌忌廉意大利飯》 Order左蠔湯再order 呢個本來覺得好似重覆左!但我真係好鐘意黑松露雜菌忌廉意大利飯,而且呢間餐廳啲蠔都出名,照試啦! 蠔香脆又唔會油。黑松露好香,配雜菌忌廉意大利飯真係冇得輸!雷囡s都超鐘意! 《炭燒紐西蘭西冷》 又係情意結,去西餐必食嘅就係西冷...medium剛好,外皮夠香,肉汁夠多又唔會出血水,咁嘅價錢唔係間間做得咁好。抵讚 《甜品拼盤》 所有餐廳有拼盤我必定叫拼盤。唔洗諗又可以試多幾樣。啱晒我。 馬卡龍聽說超好食(因為一嚟已被秒殺,dd都唔留俾我) 老公鐘意件cheese cake, 香滑唔太甜。 朱古力都正,夠香濃。 果杯小甜品好特別,面係似金寶嘅脆粒粒,配埋酸酸甜甜嘅櫻桃醬,加埋大大粒車厘子肉,唔會太淋保留返口感,好好食!推介! 《兒童餐》 肉醬意粉、魚餅、沙律配鮮橙汁。 唔洗講,全部都係小朋友鐘意食嘅野。有個啱食嘅兒童餐照顧佢地。我終於可以自己想食咩就叫咩,唔洗就佢地 順帶一提杯 《菠蘿有機奇亞籽綠茶》 唔太甜,仲有粒粒菠蘿肉同奇亞籽有口感,配埋綠茶剛好消消滯。唔錯 本來已經飽飽好滿足,原來仲有驚喜,兒童餐仲送 #扭蛋! 真係估佢唔到。雷囡s開心到傻左。 真係對小朋友好細心,極友善,好值得推介嘅一間西餐廳! 地點好好,石門,勁多親子班,工作坊,興趣班嘅地方,我知好多朋友都經常會去, 下次不妨試下呢間吖! Su Casa 網址: https://s.openrice.com/QrbS0vIm900 地址: 沙田石門安群街一號京瑞廣場二期地下G03號舖