把握最後機會,再唔去就冇喇,黑暗中的對話體驗館

圖像中可能有1 人、微笑中、站立和文字

之前已經聽過呢個 #黑暗中的對話體驗館 好耐,亦都有睇過相關介紹。但始終都未有機會嚟。可能因為個名令我有少少誤會,所以冇詳細考究到底係乜東東。孤陋寡聞嘅我仲以為只係入間黑房,同小朋友「#黑暗中對話」。心想,我晚晚都同大囡黑暗中對話㗎啦!洗乜俾幾百蚊去咁遠呀?

咁啱最近睇新聞又知道好像只做到九月底就結束,正諗緊幾時去體驗返次嘅時候,巧合地有幸得到朋友邀請,當然即時報名啦!當時雷大囡聽到「#黑暗」呢2個字已經即時Say No! 我又氹又求佢都話唔去。咁我唯有出絕招!佢只好應承啦…
出發前佢仲不斷話想唔去,但好彩一去到見到幾個相熟同學仔即時開心返晒!

圖像中可能有2 人、微笑的人、文字

一開始有位姐姐同我地介紹裡面嘅情況,果刻我先如夢初醒,原來今次冇我份..只有小朋友入去。原來黑暗中對話唔係我想像中要同佢地對話,而係要 #親身體驗 #視障人士 嘅日常生活。體驗佢地嘅「#黑暗世界」…聽完我即時好有興趣,自己都好想去試。
行程長達九十五分鐘。班小朋友每人一枝白杖,手拖手排好隊入去。我地大人就好放心咁去隔壁嘆下午茶等啦。媽媽們表面好似好輕鬆,但個個心裡面都好擔心小朋友人點呢? 我自己都一樣,因為雷大囡一直都好怕黑,怕黑怕到到而家都要同我一齊瞓。所以我都擔心佢會唔會喊呢?有冇好驚呢?

圖像中可能有3 人、大家站著和小孩
終於過左漫長嘅九十五分鐘,大囡一出嚟我即時衝過去攬住佢,問佢有冇驚有冇喊,佢竟然話玩得好開心。而且個個小朋友都話點解咁快完?原來佢地喺裡面好多野玩,又要過橋,又有得搭船…仲有得去買野食。唔怪得咁開心啦!之後仲有導賞員哥哥出嚟同大家分享感受同解答問題。令小朋友知道更多有關視障人士生活。我都學到唔少野!下次有機會我都要親身去體驗一下!

圖像中可能有一人或多人

體驗完後,我都即時趁呢個機會教導下佢地,要珍惜同好好保護自己眼睛,唔好成日玩手機。而且要學懂尊重視障及其他傷健人士。最重要係學識感恩,因為身體健全已經係好幸福嘅事。每日瞓醒打開眼就見到光,呢啲對佢地嚟講咁簡單嘅事,唔係必然,唔係所有人都有呢個機會。我地可以睇到野已經係好幸福嘅事。

喺呢個物質豐富嘅香港,懂知足同感恩嘅人越來越少。希望大家多啲留意下自己身邊嘅 #小確幸,更加要珍惜自己擁有嘅一切。

非常難過嘅係,呢間咁有意義而且咁有良心嘅社企,因為租約問題唔可以繼續經營。希望政府可以幫幫忙,批出一個小小嘅地方俾佢地,令我地嘅下一代可以繼續喺呢度獲得 #正能量,學習 #正面思想。咁樣呢個社會都會更加和諧,大家話係唔係??
如果大家有時間,真係要趁機會帶小朋友去體驗一下。

「黑暗中對話體驗館」於第三季租約期滿後將正式停止營運,最後營業日為2018年9月30日。

真心希望黑暗中對話體驗館可以搵到好地方繼續經營下去!

#唔好意思,又超級長氣左。
#真係一個非常好嘅體驗
#發人深省
#獲益良多

⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯

想知多啲我地嘅 #生活小貼士#簡單食譜#育兒分享#吃喝玩樂#美容#親子遊#親子烹飪 ,快啲Like我地啦

Facebook page : 雷囡媽媽 https://www.facebook.com/pg/luiluimamak
Facebook:https://m.facebook.com/luiluimama
YouTube: Luiluimamak https://youtube.com/results?q=luiluimamak
Instagram: https://www.instagram.com/luiluimama/
Blog: https://luiluimama.blogspot.com

This entry was posted in 其他, 其他, 活動, 消閒, 知識, 親子 and tagged , , , , , . Bookmark the permalink.