【假日搵食】懷舊茶餐廳 x 好味蛋撻芝士撻 | 親子揾食團

最近我哋放假,去咗食好西。
雖然係大肚婆,但食都係好重要嘅,正所謂大嘅唔食,細嘅都要食。 

今次,我哋去咗九龍城揾食。九龍城真係超多食店,仲要係好食嘅!
但我哋今次介紹嘅,並唔係火鍋店同埋泰國餐館。

我哋今次去咗兩間食店,舖位仲喺正隔離,真係超方便! 


首先嚟咗呢間以懷舊老香港主題裝修嘅茶餐廳,食個早餐/午餐。
因為舖位唔算好大,所以去到都要等一陣位先有得入。


而早餐供應時間至11:30am,我哋去到等埋位,已經無早餐了… 
所以唯有叫常餐,先有同早餐同樣嘅美食。 


我哋點咗2個常餐,其中一份蕃茄湯粒粒餐肉通粉,配黑松露炒蛋、茄汁豆、蒜蓉多士。
另一份係沙嗲牛肉麵,同樣配上面嘅美食。 


蕃茄湯超香濃,仲有蕃茄肉,好有誠意,不過通粉份量就略為較少。 

而炒蛋都好滑,仲有好香嘅黑松露味。
蒜蓉多士都好好味,唔會太咸太重味,但就略嫌多士唔多脆口。


去茶記都係必食嘅沙嗲牛肉麵,味道都唔錯~

凍檸檬茶,用鋼杯盛載,可以保持凍冰冰。


食物方面,整體我都好滿意。


餐廳方面,有少量卡位。其餘都係長方形嘅矮櫈,所以如果帶住較年幼嘅小朋友又想去的話,就可能要等耐少少,等卡位了。

^ 懷舊老香港主題裝修嘅茶餐廳

嘆完個精美早餐,就去咗隔離「酥妃皇后」買撻食。

一見到呢到嘅撻,我即刻諗起日本超人氣嘅「Pablo」芝士撻呀!!
和牛B同我一樣都係甜品控,所以佢見到都相當興奮!!

賣相、款式都好多選擇: 原味軟心芝士酥撻、咖啡軟心芝士酥撻、奶黃芝士軟心撻、朱古力軟心芝士酥撻、焦糖什果仁酥撻、朱古力白香果撻、香檸奶油酥撻、朱古力脆米酥撻等。


除咗酥撻,餅店入面仲有蛋糕、曲奇餅出售。
賣相一樣吸引,睇見到流口水呀!!

由於剛食完午餐,最後唯有買外賣返屋企食。
和牛B同和牛爸爸揀咗原味蛋撻,佢哋都話好好食。
而我就揀咗原味軟心芝士酥撻,超香芝士味,真心正呀!!
^ 原味軟心芝士酥撻
【港嘢茶檔】 
地址: 九龍城侯王道22號地鋪 
電話: 23821538 

【酥妃皇后】 
地址: 九龍城侯王道24號地舖 
電話: 26831811
————————————————–

歡迎聯絡我&和牛B: chungying56@hotmail.com
Facebook專頁和牛B嘅成長專頁

Instagramwagyubmami

            
————————————————–

姊妹合作**Precious M accessories**
利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。

This entry was posted in 主題餐廳, 九龍, 其他, 好去處, 消閒, 特色餐廳, 甜品/飲品 and tagged , , , , , , , , , , , , , . Bookmark the permalink.