我地上回講到去食好正既燒海鮮 咁燒完海鮮既我地又係時候去趕下一場 就係搭船出外島過夜啦 今次我地上船既地點叫做 伊美港 而我地既目的地就係一個叫做 姬島 既地方 我地今次所搭既船叫做姬島丸 見到隻船已經等緊,所以就快快手去買飛上船 每程係570YEN,大家都可以買定來回既飛 咁回程既時候就會方便D啦 而船既班次可以按此 (回程班次可按右上角寫住 逆區間 既藍色BOX) 去到姬島落船既時候,民宿既老闆娘就揸左車黎到等緊我地 準備車我地去今晚入住既地方 搭左大約5-10分鐘既車 我地終於到達 入左門望下右邊 原來就係食飯既地方 再望下左邊,見到有個人手畫既地圖 係介紹番島上有D咩可以睇下玩下咁 再行入D就係一個好簡單既浴室 由於係SHARE BATHROOM 所以大家要就番時間排隊沖涼 佢只係得個兩層,所以行李係要自己搬上樓架 依家就黎睇下唔同既房先 先黎個家庭房 之後再黎係位於唔同既TWIN BED ROOM (西斜) 以下呢間係我個人勁推既房 望落無咩特別? 佢特別在個窗出面係有個小露台 呢個細細既露台仔因為私隱問題 所以佢淨係比預訂左上面間房既客人使用 出黎露台做咩,就係上好腳架影星星啦 下圖係小編既弱弱作品 仲有個重要既點提番大家,呢到既廁所係SHARE架 即係幾間房SHARE兩個廁所咁樣既 係食晚餐之前,大家可以問老闆娘拎張飛去附近既公眾浴場浸番個拍子水溫泉 每間房又附有下圖個籃 佢係比你拎毛巾同你需要既物品去浴場架 至於浴場點去? 出左大門之後轉左,一路沿住下圖個海行大約5分鐘左右 右邊黃色個座小屋就係啦 行到入去,果然好有傳統既味道 浴場既地方其實好細,但好貼地,好似大家係電視入面見到既場景咁 得一個細細既池,有個老人家係到浸XDD 浸完之後我仲係按摩機到按左20分鐘先捨得番民宿食飯 番去個陣都差唔多係黃昏,一個人都無真係有D驚 浸完個溫泉,又係時候去食番個好正既晚餐啦 話說係姬島上面既民宿好多都係當地漁師主理既 所以佢地提供既晚餐好多都係以海鮮為主 當中最有名氣既就係車蝦火鍋啦 而我地當日係全蝦宴咁滯 睇下有咩食先 未坐低就已經見到面前呢一堆刺身等緊我地 當你坐低左之後,負責樓面既老闆娘就會黎同你解釋每一道刺身係咩黎 食到咁上下,有個開胃既八爪魚刺身上檯 同時仲有個好滑既海鮮茶碗蒸 食完呢兩道之後,最期待既單品終於上檯啦 就係我地既車蝦豆乳火鍋 大家再埋D睇下堆好靚既蝦先 就咁望落都好新鮮 老闆娘就教我地用手拎住個尾,係個煲到淥佢5-10秒,蝦肉挺身就可以食啦 不過咁樣實在太熱,最後我地轉用筷子夾住個尾黎淥 本來以為個鍋已經係尾聲,點知後仲有唔少野食黎緊 包括以下既車蝦刺身 同埋天婦羅 勁飽,好耐未試過食咁多新鮮既蝦啦我 睇下我食左幾多先 超滿足 老闆娘會係你離開餐廳既時候問定你聽日大約搭幾點既船番去 之後會話埋你知幾點早餐同食完之後車你去搭船 由於係比較早食晚餐,所以我地當晚都有充足既時間去影星星=) 訓醒第2日,又係食既時候 我地既早餐 以上既SET係會配埋飯同麵豉湯架 包你可以飽住咁去下個CHECK PT啦 見食完早餐之後仲有D時間,就係民宿附近行左兩下 呀,有一點對大家黎講都幾重要下 就係係民宿入面,基本上WIFI蛋同PRE PAID SIM CARD都係上唔到網架 就算問左老闆娘拎佢個WIFI用,都只係有限度連得上 所以呢到都係個避世既好地方黎XDDD 多謝你地睇到呢到呀 下次再分享其他既比大家啦! 以下係民宿既資料: 名稱: ペンション野路菊 (Small Hotel nojigiku) 地址: 〒872-1501 大分県東国東郡姫島村 ペンション野路菊 電話: 0978-87-2823 官方網頁 Facebook 房價: 11880~13500YEN一人(一泊兩食) 想番去睇下偽。本地人深度遊個總覽 可以 按此 多謝大家睇左咁耐我講廢話 想問多D既話歡迎用以下途徑搵我 Email: choitsz_wing@yahoo.com.hk Facebook: littlecongi分享地攤 Line: ck6057 Instagram: little_congi /congi_share