早幾日好好天,好啱郊遊!趁住假日,我叫男友陪我去想去左好耐嘅機場維修區睇下日落、影下相,最重要係去打卡! 飛機維修區並不可泊車,所以我地將車泊係東涌,然後係東涌地鐵站下面搭S52巴士入去。巴士車程大約10-15分鐘,坐到總站落車,之後向後行3分鐘。 我地去到大約4點幾,仲未日落,所以影下相。行左2分鐘會見到一面灰色嘅牆,咁就可以開始打卡啦! 其實主要影相嘅都係同一條大馬路左右兩邊。 一邊近海並無任何圍欄,可以坐係大石上面,以海為背景影相。 點擊圖片放大 另一邊係有鐵絲網,入面停放左飛機,而呢邊會見到好多飛機起飛的! 再向後行2-3分鐘就會見到一排向海伸延嘅鐵杆(不知道正確名稱),呢度都係好好嘅打卡位。 本身我地諗住去個白色三角形欄杆打卡,不過好似要再向前行頗遠,所以打消左念頭,決定都係慢慢等日落。 夕陽無限好,只是近黃昏... 當然如果無雲遮住效果更佳 不過都已經好迷人,好靚!