早前男友生日,我係兩個月之前已問定佢想食咩,希望早早安排好。佢話想食法國菜,之後我係OpenRice做左好多research,發現可以又食到好野、有景睇得黎又實惠嘅餐廳好少,最後㨂左間我覺得菜式特別又有點情調嘅餐廳。 果日我地係附近睇完戲之後就直接過左去。餐廳都幾容易搵,而且係大廈嘅地下已有廣告牌,唔驚睇唔到佢。 上到去,見到有個banner同menu display,感覺幾似樓上cafe,不過好簡潔明亮。反而餐廳入面嘅燈光比較昏暗。 係上去之前,餐廳已打電話提醒我地當日只收現金,而且只有套餐提供。坐低之後侍應送上麵包同自家製嘅麵包醬,並推介佢地嘅生蠔,話做緊買一送一,即係每隻$44蚊,由濃至淡,有三種蠔,我見一年一次,就「蠔一蠔」,叫左半打。 如圖所見,D蠔真係好大隻,而且食落好新鮮,侍應教我地由入面開始食,濃至淡。每隻都好鮮甜,而且蠔味回甘,停留係口腔久久不散,感覺好幸福! 由於我地想每樣都試下,所以每人食嘅菜式都唔同。 前菜我揀左香煎北海道帶子配椰青果凍,男友嘅係酒香黑松露鵝肝慕絲雞卷。 香煎北海道帶子配椰青果凍 一上台見到個擺盤好精緻,想影張靚相,但真係好暗。係帶子上面嘅珠珠係橙酒同咖啡。侍應提醒最好連湯匙嘅汁一齊食,先可以品嚐到帶子嘅鮮味。帶子好嫩滑多汁,加埋清清地嘅醬汁更加突顯到帶子嘅鮮甜!隔離嘅白色圓形係椰青果凍用以清新味蕾。 酒香黑松露鵝肝慕絲雞卷 至於雞卷,個人覺得質地硬左少少,可能凍得耐左,口感一般。但男友話好香鵝肝味,好好食。 意大利風乾煙肉,蘆筍凍湯配煙燻泡沫 凍湯一上台就已經聞到好重嘅煙熏味,侍應叮囑我地唔好攪勻黎食,可以用匙更’畢’到底,一啖就可以品嚐到唔同層次嘅味道。 蟹肉白菌忌廉濃湯 我目測個湯嘅size同平時西餐嘅湯差唔多,但食落真係好飽!因為個湯比較杰身加上好多蟹肉、重忌廉味,所以就算係平時份量,小妹都只可勉強食晒。不過真係好好味! 法式香草忌廉燴海鮮酥皮盒 個海鮮酥皮盒雖然睇落去好似好細個,不過入面有好多海鮮,例如帶子、蝦、青口等,配埋個酥脆嘅酥皮盒食,口感好豐富,而且食到好濃郁嘅忌廉味。 香煎鵝肝配紅酒黑醋燴乾蔥 我地本身以為塊鵝肝係好細塊,點知一上台發現同我手掌差唔多大,而且仲切到好似心形咁,感覺幾浪漫。 係主菜之前,侍應遞上石榴味雪葩,令我地好好迎接陣間嘅主菜。 慢煮西班牙伊比利亞羊 蜜糖芥末汁 配香草焗蒜 因為我唔食羊,所以無試,不過男友話件羊鞍帶點過肥。但係佢盛讚香草焗蒜好好食,我都試左,就好似薯蓉咁,好綿滑。 M8澳洲神戶和牛 配香甜紫薯蓉 時令蔬菜伴香草燒汁 一見到和牛配紫薯呢個組合就覺得好特別,一向勇於嘗試嘅我決定叫黎試下。其實食到主菜,真心已經好飽,所以覺得應該份量會減少D,點知都係好大份!但係和牛真係好好食,我叫左5成熟,肉質好鮮嫩多汁,襯埋甜甜地嘅紫薯蓉食,感覺都幾特別。不過我覺得D baby vegetable唔夠幼嫩,有D'鞋'口。 食完個主菜,侍應遞上一杯玫瑰花茶俾我地消消濟╴清清味蕾。跟住我地就聽到由吧台開始傳黎生日歌嘅聲音,見到侍應捧住個寫住 ‘happy birthday’ 嘅甜品出黎。而且好nice咁送左張即影即有嘅合照俾我地留念。 香蕉榛子牛奶慕絲 紅茶法式焦糖燉蛋 本身以為甜品無咩特別,但係食落好好食,我果個係紅茶法式焦糖燉蛋,食落好smooth,感覺輕盈清新。香蕉榛子牛奶慕絲好香榛子味,好綿滑香甜。 食完甜品後,法國菜會仲有petit four 作結。雖然蝴蝶酥同朱古力無咩驚喜,但味道都ok。 總括黎講,呢度嘅套餐好抵食,絕對飽肚,而且service team好好人,非常值得推介。