之前跟男友預祝生日,由於佢話想食法國菜,所以我精挑細選下揀左呢間試下,貪佢菜式靚,環境唔錯。

晚市主要有4道、6道同8道嘅套餐選擇。因為自己唔中意食豬及朱古力,所以我揀左6道菜嘅套餐食。

係第一道菜上黎前有Amuse Bouche (餐前小點), 係青瓜同龍蝦肉,感覺清新,不過味道沒有甚麼特別。

接著,侍應擺個布袋係張枱,話入面有麵包可以食。打開,麵包係熱辣辣嘅,感覺好似新鮮出爐咁,可惜咬落去好韌,有點失望。

第一道菜係香煎北海道帶子配酥脆蟹仔。帶子煎完好香而且表面脆口,入面軟滑。本身以為蟹仔係裝飾,原來都係食得嘅,而且唔會硬,不過啲蟹鉗有啲細,食果陣要小心唔好整親個嘴。

第二道 ‘Surprise Dish’ 係新鮮海膽。海膽下面係濃郁嘅醬汁(由於掛住影相,無聽到係咩),另外黑色嘅係曲奇碎,紅色貌似煙肉嘅係海藻。可能sauce太濃,掩蓋左海膽嘅鮮味。本身以為曲奇加海膽會好奇怪,不過由於曲奇無咩甜味,所以都唔會令整體味道失衡。

第三道 ‘Surprise Dish’ 係蟹肉日本桃蛋沙律。賣相擺盤好靚,雖然係披著龍蝦殼,但入面係無龍蝦肉的。食落好重蛋香,配埋白桃一齊食,甜甜地味道清新,好啱夏天食。想味道濃郁啲,可點左邊嘅草莓醬食,想清新啲,可點右邊嘅芒果醬食。

第四道就真係龍蝦! 放係龍蝦肉上面嘅係烘乾的薯片、蓮藕片、羽衣甘藍及新鮮嘅芒果,每樣都食到食材嘅原味,龍蝦肉亦好彈牙!

第五道係主菜,我揀左銀鱈魚配青蘋果汁。銀鱈魚好鮮嫩,不過當我用刀切嘅時候,好難切開塊魚皮,搞到魚肉碎晒。而且個汁味道太濃,喧賓奪主。

至於男友則叫了A4和牛。牛肉煎得幾好,咬落去,表面稍硬,入面嫩滑,牛肉味濃。

第六道係甜品 – 芝麻慕絲。小妹覺得太甜,味道太濃,配下面嘅軟麵包碎食感覺怪怪的,不過份量是挺多的。

最後到petit four 嘅時間,呢度叫Mignar dishes ,是很普通的泡芙和檸檬慕絲蛋糕。

總括黎講,食物嘅擺盤賣相靚,不過味道就沒甚麼驚喜,感覺不像法國菜那樣經過精緻細膩的處理,不過不失。

Le Rêve : 銅鑼灣耀華街38號Zing! 10樓

This entry was posted in 外遊美食, 情侶約會, 法國菜, 特色餐廳, 知己聚會, 香港 and tagged , , , , . Bookmark the permalink.