北上尋歡己經成為左小妹同男友/閏蜜的週末消遣好活動。每次覓食離不開都係烤魚同酸菜魚,今次試嘅餐廳聽講好食過太二酸菜魚更被稱為可能係廣州最好食嘅酸菜魚 - 祿鼎記,咁啱我地行經嘅商場有得食。 由於見人話夜晚去食要排1-2個鐘,所以我地6點左右就到達餐廳拎位。不過可能係落雨關係,唔使排隊就可以入去了。 祿鼎記裝修走現味中國風,門口仲可以見到星爺套「鹿鼎記」電影嘅片段!最大嘅賣點係標榜一次性用油,令人食得安心‧ 一入去嘅時候,待應會同你講恭喜發財! 當待應互相碰面時都會互相恭喜發財!營造喜慶嘅氛圍。 一坐低,侍應會奉上一杯八寶茶,跟住好似表演咁用長嘴壺倒茶,盡顯功架。八寶茶用料十足,飲落甜甜地,陣間食辣野就可以中和下。 如要食酸菜魚需要兩條起才可落單 (大約一斤一條),所以我地叫左兩條招牌酸菜鱸魚,不過價錢實惠,每條$48,兩條都係$96!見到咁平,食指大動嘅我地再叫左兩樣小食︰清湯雲吞同燒椒黃金皮蛋。 招牌酸菜鱸魚($96) 果然大好碟,上面鋪滿晒各種辣椒,油也是薄薄一層,唔太厚,唔似上次我地食果間,油浸住食咁,仲食到我肚瀉,真係不堪回首。 本身以為好辣,點知又唔係好辣,連唔太食得辣嘅我 (我譚仔食10小辣) 都食到,而且唔會過咸,食完有少少麻。鱸魚肉質超滑溜,感覺魚肉新鮮。 燒椒黃金皮蛋 ($22) 呢道皮蛋一上枱令我心心眼,因為中間黃色嘅蛋黃係流心架,超吸引。當然食落都無失望,充滿皮蛋香味,而且好爽滑,不過比起酸菜魚就辣左少少。 清湯雲吞 本身驚太辣,所以叫左碗清湯雲吞清洗下味蕾。不過估唔到清湯係清到無咩味道,連咸味都唔明顯,我懷疑係自己食完酸菜魚,太大對比下試唔出湯嘅原味。不過雲吞味道也是很淡的,我只能說呢道菜真係好啱中意清清地嘅人。 祿鼎記 (來福士店) 地址: 南海大道2163號來福士廣場5樓 電話: 0755-86700368