今次去首爾主要因為小妹早前得知原來10月初係觀賞波波草嘅好季節,所以即刻飛過來潮聖,當中首推位於京畿道楊州市 (首爾近郊) 的Nari 公園。

我地由明洞出發,坐地鐵4號線到倉洞再轉1號線往楊州,車程大約1小時。出左地鐵站後過對面馬路搭80號巴士,到第13個站落車,大約10-15分鐘。

Nari 公園入場費₩2000,地方好大!除左有我好期待嘅波波草,仲有千日紅、粉紅亂子草、紅玫瑰等,慢慢行應該都要1個小時,要打卡影相大約要半日。另外,我地星期一去,遊人唔多,好好拍!

除左遼闊嘅花田,公園內有不少打卡位,輕鬆就可以影到靚相。我地下午先去,所以影到逆光相,不過建議早上去,唔駛背光,更加好影!

紅色復古電話亭係必影之一。

花田中間有個觀景台,可以上去影晒成個景!不過人就比較多,要排隊影。

花田旁邊有唔少長櫈,行累左可以坐低抖下。

當中,唔少花田都圍起左,係唔可以行入去影,我地影果陣見到有人行左入去,即刻俾工作人員警告。建議都係企小路中間,然後借鏡影。

當日最用受歡迎嘅夢幻粉紅亂子草都係圍起左,而且條小路好多人,只好坐住影。

要係首爾睇波波草同各種花花就要安排10月頭至中黎啦!

楊州Nari 公園

地址: 458 Mansong-dong, Yangju-si, Gyeonggi-do, 韓國

入場費: ₩2000

 

 

 

 

 

This entry was posted in 其他, 南韓, 活動, 消閒, 觀光, 遠足 and tagged , , , , , , . Bookmark the permalink.