早幾次北上都係去cafe,男友呻話無啖好食,於是小妹今次特登搵左間好野同佢試試,滿足下男人嘅胃!除左打邊爐,烤魚都係北上覓食嘅好選擇,而今期最紅嘅就係探魚,於是小妹決定探一探佢嘅虛實。 我地仲未到7點就已經衝左去攞籌,一去到就見到門口好多人坐係度等侯,而服務員亦告知要等個幾鐘,於是我地就係商場周圍行下消磨時間。 差唔多到8點,我地就上返去餐廳,見就到我地,於是拎張菜單睇定食咩先!除左烤魚之外,仲有串燒,幾蚊至20蚊一串,感覺都抵食。另外仲有超過20款小食同前菜可以選擇。由於我唔食得辣,所以我地叫左招牌口味中嘅醬香烤魚,加大白菜同金菇。 餐廳佈置好靚,同cafe不相百仲! 餐具都幾可愛! 等左大約5分鐘,一盆大大盤嘅烤魚就出現係我地眼前!兩個人食,真心驚食唔晒! 不過真係好香!本身我地以為大白菜同金菇另上,原來係埋左係條魚下面,咁可以吸收晒D醬汁嘅精華啦。 同條魚合照之後,我就開始用盡洪荒之力食食食... 條魚肉質真係好嫩滑,而且同D汁都好夾。不過食食下開始有D咸,好彩有D配菜平衡返。如果唔係,我都驚增加腎臟嘅負擔。 食完之後我地先發現原來餐廳有免費嘅檸檬茶飲,可惜我地已經叫左茅根水。不過整體黎講都值得推介。 探魚 地址: 東門1234商場5樓L511 點去: 地鐵1/3號線老街站A出口