見到咁大碟烤魚,無錯!我地又北上尋歡!依加真係北上多過食飯,哈哈!不過今次呢間唔止有烤魚食,仲可以簡牛蛙,或者鴛鴦鍋。 今次其實我地並無話想食邊間網紅食肆,主要係上去揼骨 (如有興趣,可介紹,價錢唔貴)。由於我地比較晏先去到深圳灣,所以揼完骨已經成7點,我地見附近有個商場,所以即刻入去覓食。 行左兩間餐廳後,我就停左係呢間餐廳前面,因為真係好香!係係門口已經聞到好濃郁嘅香氣,搞到我流晒口水,只到你黎睇下,就會明白我講咩!所以我地二話不說,即刻入去。 不過餐廳佈置裝飾都好靚好有心思,有綠葉圍繞嘅燈下面有印左唔同動物嘅櫈,同cafe不相伯仲。 我地見肚餓,所以除左叫烤魚,仲叫左2-3款小菜。 涼拌皮蛋嘅皮蛋係流心架!一咬入去,蛋白部分好彈牙,蛋黃好香濃幼滑,齒頰留香! 另外個雞煲都好出色!雞肉唔會老,係嫩滑嘅!加上各種嘅香料,好好食,比香港食開嘅雞煲,味道更多層次! 食下食下,條魚就登場啦!因為我唔太食得辣,所以我叫左酸菜魚。真係好大條,不過自從上次食完之後,今次對個體積已經無咁嘩然。下次再試下牛蛙。 我地追加左芝士腸同金菇,我覺得今次嘅味道比醬香烤魚更有層次,可能酸酸甜甜掛! 由上圖見到,魚肉剛剛好熟左,但唔會老,食落好滑。另外,我見有得飲芝士奶蓋,叫左一杯,原來好大杯,好似係裝啤酒果D杯,今次真係飲飽食醉。 牛蛙戀上魚特色主題餐廳 地址: 深圳南山區科技中3路1號海洋銀河科技大廈2樓208號鋪 電話: 0755-8670 6456