小妹真係好好好中意食芝士,芝士蛋糕更加係最愛嘅甜品之一,所以收到風話Cheesecake Factory係香港開分店就即刻約閏蜜朋友去試,等左咁耐,終於食到啦啦啦,很是興奮的!

我係下晝兩點半度到,本身諗住佢都開左一排,又唔係lunch或dinner時間,應該少d人掛,而且門口排隊嘅人龍都唔長。點知原來條隊係排黎拎我籌,到我嘅時候,個女仔好細心咁提醒我話要等90分鐘,問我等唔等,我當然等啦!但實在太肚餓,所以我地去附近醫左肚先返黎,果然唔遲唔早,90分鐘即刻到我地。 Cheesecake Factory嘅燈光真係幾昏暗,而且偏紅色,我地想同d cake合照都唔係咁易,會影到個人塊面太紅,不過情調是不錯的!

我地一坐低就有個外籍嘅侍應遞上menu而且好熱情咁問我地係咪第一次黎,仲好詳細咁介紹佢地熱賣嘅款式,包括以下3款。

聽完意見之後,我地都認真地研究左一陣,發現menu好多蛋糕名都好特別,例如Chris’克里斯驚人芝士蛋糕、Craig’s克雷格瘋狂紅蘿蔔芝士蛋糕同朱古力燕尾服忌廉芝士蛋糕,真令人好奇到底係咩味道! 但我地為免中伏,最後都係叫左最受歡迎嘅鮮士多啤梨芝士蛋糕、無敵紅絲絨芝士蛋糕同奧利奧非凡夢想芝士蛋糕。 

點左餐後,小妹忍唔住出去cheesecake櫃望下,真係好多款,而且個個樣貌十分討好!好想全部試勻晒佢!
黎啦黎啦!個芝士蛋糕比我想像中大件,睇落好似都幾抵食。呢個鮮士多啤梨芝士蛋糕上面嘅士多啤梨已沾糖漿,所以食起黎一d都唔酸,好甜,清新!個蛋糕上面同側邊有兩舊好大嘅忌廉,可以配埋一齊食,以中和芝士蛋糕嘅甜膩度。呢個芝士蛋糕係原味果個,只係加左士多啤梨,食落口感好綿滑,感受到非常濃郁嘅芝士味,真係好幸福啊!超香超好味!我地3人分,每人嘅分量唔多,但食完個士多啤梨芝士蛋糕之後我已經飽飽地!
跟住試紅絲絨芝士蛋糕,佢係一層芝士一層紅絲絨蛋糕,而佢用嘅芝士並非原味果款,芝士味淡點,質地就差唔多,都係好滑溜。中間嘅紅絲絨蛋糕清清地,食落口感濕潤,不過外面有白朱古力碎,為蛋糕增加甜味。整體黎講,呢款比原味清淡,建議可試食呢款先。
最後亦係3個中最甜最漏嘅奧里奧非凡夢想芝士蛋糕!蛋糕除左有塊曲奇外,上下各有一層非常濃郁嘅朱古力醬,當幾層一齊食嘅時候,真係好好好甜!呢個時候,建議將忌廉搽係蛋糕上一齊食,中和蛋糕嘅甜味。
其實除左甜左d之外,蛋糕都好好味,好值得推薦!

 

This entry was posted in 九龍, 甜品/飲品, 甜品糖水, 美國菜 and tagged , , , , . Bookmark the permalink.