出發到南美前,聽左幾百萬個係南美旅行遇險既故仔,係嚇到鼻哥窿都無肉既時候,張好貴既機票同我講,你宜家點都要出發。然後個半月既旅程就係突然之間黎到尾聲,當初既淆底獸會慢慢變成習慣,享受,最後會為左要返香港而仰天長嘯左十分鐘。 好難想像由入大學先第一次自由行到台灣,只係過左兩年,就夠薑一丁友落南美,在此想分享下如何初哥出城,無穿無爛咁返歸。 Quito, Ecuador Puno, Lima Flamingo in Bolivia 現金 只係帶足夠的金錢出門係一定既原則,所以每日只會帶大約二十至三十蚊美金出門。係南美,無論坐車定食飯都唔係好貴,除非你狂坐的士又或者當日要坐長途巴士,如果唔係大約兩蚊美金應該就夠做交通費有餘。至於食飯,就睇你有無心機搵餐廳,同常漢堡包薯條個啲都係二至六蚊美金一餐,不過成日見到呢啲就真係人都驚,所以通常我會自己行多幾條間,搵間靜得黎又有Wifi, 重點係有Menú del día 既餐廳,同常兩個半到四蚊美金就有齊前菜,主餐,甜品同野飲,係大件夾抵食之選。 至於提款方面,個人經驗係有一張Plus或者Visa 既提款卡,會好過只有Mastercard或者銀聯卡。前兩者普遍程度較高,基本上街上既提款機既店鋪都支援到。稍提一下既係當去到秘魯個陣,雖然Global net 呢款提款機真係無處不在,不過手續費都幾貴,所以都係搵翻普通銀行既櫃員機會抵啲,價位上可以差成一倍。當然要記得係出發前開啟海外提款功能,如果唔係到時就可能要靠香港既親人由香港經Western Union 匯錢到南美國家。同樣地,其分點都屬普遍,但係手續費係根據所匯既金額調整,大概收金額既百分之十至十五,所以通常只係會當自己提款卡失靈,遺失或者唔夠錢既時候先會用既最後一著。 (Plaza de Armas, Arequipa, Peru) 搭的士 去得旅行,其實邊有可能晚晚天黑前番到民宿,灰姑娘都無咁早翻屋企,所以經常會遇到夜晚獨自歸家既時候。如果你非常清楚巴士點搭,其實搭係無問題,因為有架巴士係度,每日都有幾廿萬個local仲搭緊,所以唔使咁緊張搭左會死。至於你話驚唔驚偷野個啲,就一陣再講。 另一個情況就係,如果唔熟巴士路線,或者巴士站異常偏遠,又或當時巳經非常夜,甚至該區係舊區,周圍好多爛仔...總之係任何你覺得唔安全既情況之下,就巳經無選擇既權利,通通只能搭的士解決。上到的士,第一時間同的士司機講要用咪錶(呢度講緊係厄瓜多),跳錶係世上最公平既遊戲,當然如果佢係咪錶出術,咁就真係你唔好彩啦。每次要講用咪錶,我都要用上我超爛既Spanish,好似大陸人夾硬要講廣東話咁講 " con el taxi metro, por favor." 遇着有啲陳庭佳同你玩開價既話,就睇你自己有無sense 或者之前有無Google 過兩邊大約既距離係幾多黎估價,當然佢講咩都殺價百分之二十至五十(自問自己講唔出半價以下既價位咁誇張),大家來回再噏多一兩次價錢,就應該唔會俾人劏得太勁。 順帶一提,講價個陣就住Chok 番個「我唔係非要坐你架的士不可」既樣出黎,成功率係會大啲。 不過,我都曾經遇過超小器司機,係落車個下又話頭先行遠左要加錢,仲要係行多二三百米既路,話要收多三蚊美金。係呢個時候,唔俾錢又落唔到車,俾錢又戇居,女人仔唯人低頭扮慘狂講" uno, uno, por favor x 1000000" 當自己唔好彩俾一蚊美金止血算。 但係當去到秘魯,玻利維亞同智利,基本上都剩係得口講,所以就正如先前所講,自己google定距離,咩都講價,又或者係酒店,車站,機場出發,就問下職員去某個目的地大既幾錢,就可以盡量貼近市價出發。 地圖 Google 地圖有個好好既功能,就係save 地方,幫你用粒星星mark起哂你既目的地。當然要記得下載離線地圖,因為長期只靠wifi生存既我,基本上一出到街就只可以靠GPS定位知道自己係邊。又或者大家可以用maps.me呢個apps做後備,佢可以一次過下載成個國家既地圖,咁就可以避免有時唔記得下載Google 地圖,又唔知自己係邊條街呢個問題。 (Quito, Equidor) 防偷野 係Google 搵南美偷野,啲故事真係多到令你覺得不如直接翻香港算。但係因為咁樣就退縮,實在係無可能,所以我會好好好小心防俾人偷野。 第一,基本原則,好似上面咁講,現金要周圍放,同埋放係袋中袋中袋,收到好難搵到啲錢係防小偷既第一步。當然我係會有個散紙包放係易攞既地方,不過只限係我自己覺得安全既城市同區域,而入面既錢亦都只係夠你隨時買零食個個價位。 第二,加鎖。大大個鎖鎖係背包到,係賊都覺得你煩膠。雖然成日一俾錢或者攞野個下,真係會覺得好麻煩,但係比人偷野個下其實會仲煩。 第三,如果要係車站等車,覺得同圍好多人都所有人都好似賊樣,我一定會簡坐係成班女人,成班原著人(純樸民族兼紮孖辮個啲),又或者一家大細既隔離,千其唔好自己一丁友盪來盪去,鬼唔知有條水魚遊緊咩。 第四,做戲。係呢個時候,防俾人偷野好似考緊你演技咁。當中既課題包括如何Chok 個狠樣或者全知者既樣;如何扮演當地既華僑而非遊客;如可睇落我仲窮過你既樣等等。當我同可疑既人對到眼,就會Chok 個我一啲都唔驚既樣,只要你Chok 得起,就巳經踏前左一大步,去到安全既理想彼岸。 第五,電話放褲頭。係香港,大多人習慣電話放褲袋,但係咁樣放,成個電話會現哂形,好似同人講我有部電話係到咁。所以由到南美第一日,我就會將部電話zip係褲頭,再用件衫蓋住,咁樣你自己都可以長期感覺到有個電話係到。 係去左厄瓜多,秘魯,玻利維亞同智利北部呢幾個地方既之後,個人覺得要留神多啲既地方有厄瓜多既基多加所有車站,秘魯既Chiclayo,各地既historical area 及成個玻利維亞(雖則Uyuni遊客極多);智利則感覺極度發達,所以唔使太擔心。 最後去左成個幾月南美旅行,雖然偶有聽聞新識既朋友曾經遇到被人偷野既情況,不過其實自己小心啲,治安又未去到想像中咁差同恐怖。 坐夜車 每當坐夜晚巴士既時候,錢一定會分開放。銀包有啲,散紙包有啲,同埋我一定會係鞋個度zip張一百蚊美金,可能睇得戲多先會咁做,但係以防萬一無死既,廢事真係打劫既話會 一個仙都無剩。 至於究竟要坐邊種巴士,網上同旅遊書既分享大多都只會提議遊客選擇返Touristic bus,因為巴士公司既信譽較好,安全程度較高,但自然價錢也會比較貴。為左慳錢,對搭巴士既要求越降越低,最後變成當天想去邊,就上網查大型既巴士公司大概幾點出發,到約莫既時間,就出發到巴士站,見到邊間價錢合理,門面唔差,就即買即上車。不過呢個方法並唔適合於係旅遊旺季出發既行程,或者某些喜歡預先計劃所有行程既,追求安心既遊人。 話明夜車,乘車時間大多有夜晚六至十點開始,坐到第二朝。坐touristic bus例如係非常出名既Cruz del Sur,無錯係可以舒服啲,座位可以較後既角度大啲,但價錢其實直逼飛機價。個人覺得Local bus都唔係想像中咁差,只要你煉成一上車就入睡既技能,基本上坐咩車分別都唔大,因為一訓醒,天光個下,就已經差唔多到目的地。不過,當然要注意所有貴重物品一定要跟身,呢個基本原則就無論做咩車都要留意。 追加Local bus既一個伏位就係有時候你想去既目的地未必係個程巴士既終點站,所以上車前記住確認一次目的地係終站定中途站。如果係中途站,最好係預計到達時間之前開GPS 不時睇下自己係邊,在遞張車票俾個車僮望下個目的地,對方就大概會明,可以確認到自己有無過左站或者係到站個陣叫埋你落車。 飛機票 為左慳錢,基本上除左飛去厄瓜多同飛離利馬個程係坐飛機之外,全程都係靠坐巴士遊走。係買飛機票上,用既網站都係典型Skyscanner, Skypicker,及只限學生專用既Student Universe。不過一提大家,如果時間及預算均有限,折衷既方法係當有內陸既行程就坐飛機,過境就轉坐巴士,因為南美普遍內陸飛機票票價仍算合理。 (Tributary of Amazon River, Ecuador) 打針 為左安全起見,係去之前應該諮詢自己位家庭醫生,或者預約到訪位於灣仔或者長沙灣政府合署既旅遊健康中心,詳細了解下自己所去既地方尤其熱帶雨林有咩高風險疾病同相應既疫苗需要注射,去高原地方又有咩藥物需要帶齊。例如個人係出發前注射四支疫苗,包括黃熱病針連注射證明書($200),甲型肝炎($185),傷寒($120)和白喉及破傷風($60),連診症費用$315,共花費$880。 保險 記住買保險,記住買保險,記住買保險,因為好重要,所以要講三次。如果擔心自己去南美會俾人偷野,唔見野,就記住買啲可以包賠電子器材損毀,現金被偷竊都包既保險。 其實只要你要銀兩,有時間,夠膽買張機票,無穿無爛去南美並無想像中咁難。