【美食+手信】Glory Bakery烘焙店:代表到香港的手信

某一日係逛街的時候,經過呢間叫Glory Bakery既曲奇餅店,店舖一眼就望哂唔係好大,但舖頭門口就擺放左一個巨型的胡桃夾子公仔,最吸引我注意力的,是旁邊放左個牌大大隻字寫住「日本人氣旅遊天書aruco 2018/19年選定為香港美味手信第一位」!先講下呢本叫aruco既書有什麼特別,曾被tripadvisor票選為日本第一名的旅遊書《地球の歩き方》,基本上隨便係香港任何一間書局都可以搵到佢既中文版,我之前去東歐都有參考過,而這本aruco就係佢既姊妹作,所以參考價值很高!香港的曲奇餅店開到成條街都係,例如曲奇四重x、強國人最愛的珍x曲奇等等,有什麼特別令到Glory Bakery可以突圍而出被選中,可以威到去日本呢?

店舖兩旁放滿的就只有曲奇餅,不過據店員所說,如果老闆心情好有時間的話,也會製作一下果醬來賣~這裡標榜的是無添加防腐劑,不含任何泡打粉和梳打粉,而且係100%係香港新鮮製造的手工曲奇!每一款曲奇餅都可以先試食才買,而曲奇餅則係以重量去計算,價錢很公道。曲奇餅有拿來作手信的盒裝、樽裝和普通的袋裝,袋裝通常有9-12塊,視乎重量而決定。至於盒裝真的很適合用來作手信,因為個鐵罐好靚,聽店員講都係老闆自家設計的,拿來送禮一流(店員說如果想買來新年送禮,最好預先訂購以確保有貨,因為新年通常好full),盒裝也有分大和細,有唔同既組合。

 

包裝好看固然係被選中做第一位的重要因素啦,但更重要既係曲奇餅,而曲奇餅有什麼特別?無錯,看返上面張圖就知道係以香港茶餐廳做主題既幾款曲奇餅啦!完全充滿著地道色彩!有咖啡朱古力、阿華田杏仁粒、好立克夏威夷果仁和檸·檬·茶,檸檬茶係我最以想不到會做到的味道,另外亦有各式各樣的果仁口味、抹茶和牛油等大路款式~因為我是買來自己吃的,所以就唔使咁靚買左包裝曲奇來食,兩包以上會平一點的~我今次就買左兩包檸檬茶和一包竹炭葵花籽兩種口味,但我也即時試了幾種,個人覺得阿華田口味比好立克味道更突出,一食就有好濃既阿華田味滲出來,加上幾片杏仁更錦上添花;至於牛油味就好鬆化,甜度剛剛好,食完成口牛油香。

至於我所選取的兩種口味,竹炭葵花籽味食落好鬆化,佢食落牛油味冇牛油味咁重,多左陣竹炭香味又唔會太甜,而且佢這款曲奇是暫時唯一一種用上了兩種果仁,除了葵花籽外還有核桃,所以食落口感會豐富點,有鬆化又有果仁脆,絕對係好好食!至於最特別的絕對是檸檬茶味,出面並不常見,餅身黑色一點點的是檸檬碎,咬下去有微微的紅茶澀,最尾又有絲絲檸檬香和酸味,超級神似係茶餐廳飲到咁既曲奇版,絕對令人充滿驚喜!

如果用JCB卡買仲會有九折優惠(店員說是因為老闆要答謝日本方面的推介,所以當JCB找上他們就答應了)~這裡的曲奇餅買來送禮或是做手信絕對會令人覺得充滿誠意,絕對係一款代表到香港本土特色的手信!不買來送禮也絕對值得買來自己食呀,下次再試埋其他口味先!

推薦指數:★★★★

抵吃指數:★★★☆

地址:旺角店:旺角洗衣街161號E2D

尖沙咀店:尖沙咀加拿分道10號嘉芬大廈地下C舖

營業時間:旺角店:10:00-20:00

尖沙咀店:10:30-21:30

電話:旺角店:2203 4300

尖沙咀店:2811 8482

網址:https://www.facebook.com/glorybakerycookieshk/?ref=br_rs

This entry was posted in 零食, 香港 and tagged , , , , , , . Bookmark the permalink.