如果你同小酷米一樣,習慣從雙連捷運站1號出口行去寧夏夜市的話,相信你對依條有9條行車線嘅馬路一啲都唔陌生。 我記得當時我係第一次獨遊台灣,當我由1號出口行到依條馬路時,當堂左個凸,因為"大鄉里"小酷米喺香港冇見過咁闊嘅馬路,而且台灣嘅交通規則又好鬼"特別",喺行人燈著住綠燈公仔時,司機係可以合法地右轉,(是咁的...基本上要右轉嘅司機係要讓行人先過,但喺放工時間,交通咁繁忙,搵鬼睬你咩?)真係見到都有啲腳震..... 所以我打算企定喺道,睇一次轉燈,睇清楚究竟啲車點行我先再過.... 可能當時我表露左一個無助樣吧~ 有個年約80歲嘅婆婆走埋黎同我講"不要怕",跟住佢就拖住我同我一齊過依條馬路...... 之後我未黎得切同佢講"謝謝"佢就行開左..... 就係依種人情味令我深深愛上台灣,"台灣最美麗的風景是人"依句說話講得真係好好! P.S 小酷米每次同友人分享依個故事大家都會問"個呀婆有冇腳嫁?", "有冇下巴嫁?".....痴線!雖然我好冇心肝咁忘記左婆婆個樣...但我記得婆婆隻手係暖嫁,絕對唔係你地心諗果啲囉.........