喺岩岩過去嘅星期日(27/12)西九文化區苗圃公園有個名叫"執野",係一個以物易物嘅活動,將屋企唔要、用唔著又唔想浪費嘅物資作交換。 入場後,先將你帶黎嘅物資交低比工作人員集中處理,之後就可以去"執野",簡你岩用嘅帶回家。 唔係講笑,真係咩都有得執,文具、玩具、廚房用具... 衣物、飾物、床單被舖.... CD、DVD、書本雜誌................ 重有好多係你估唔到嘅野,包括有漬布碎、用過碎晒嘅化妝品、穿窿發毛嘅高踭鞋都有,你想執到合適嘅物資就要睇下你有冇運氣同"實力",換句話講,好野係手快有手慢冇,出手要夠快、狠、準。工作人員會不定時將收集到嘅物資放喺場內貨架,有啲(貪小便宜)心水清嘅人就會望實工作人員幾時出黎,跟到貼一貼,件物資重喺工作人員手上就已經比佢搶左.... 小酷米當日真係有啲漏氣,半個鐘都冇收穫,所以我試圖"守株待兔",企喺其中一個貨架側邊等,點知工作人員行出黎,就引左一大班人衝過黎,頓時覺得自己身處金魚缸內.......望見主人攞出魚糧,魚就往那邊游,主人將魚糧放喺水面,魚就駁命搶食......而我就係搶唔到魚糧,重要比其他魚撞飛嘅金魚... 小酷米重見到有2個大媽分工合作,搶埋搶埋2大袋"紅白藍",之後坐低分贓...其實有好多物資佢地都唔知係咩,唔知點用,只係見野就攞....其實大會推行依個活動唔係比貪便宜嘅人去攞著數,係想環保,減少浪費,但有部分人嘅思想真係錯得離譜......本身個活動的確係幾有趣、幾有意義,不過下年如果要再舉辦,可能要改善一下"執野"嘅程序或者玩法,如果唔係就要考慮一下改名做"搶野"會貼切啲。 歡迎登入Facebook讚好我們的旅遊專頁台灣追星星手記