講起食韓國嘢,大家都可能淨係會諗起尖沙嘴韓國街。但係其實除咗韓國街以外,港九新界區區都有好嘢食!今次Kongirl就帶大家入元朗,試試呢間元朗後生仔女都話正嘅芝士排骨! 呢間119 Korea Station以韓國消防作為主題,而119就係當地call消防嘅電話號碼啦! 7點鐘已經好多人排緊隊啦!所以建議大家可以早啲去拎飛,再行下隔離嘅千色廣場、Etude House同嘉誠廣場就差唔多架啦!:) 門口擺咗兩排鐵罐凳仔,俾顧客坐住等! 好啦,入得去啦!一入門口呢度係影相位嚟架,有個像真度好高嘅電話。 枱同枱之間嘅間隔絕對唔馬虎,側邊仲會有盞燈仔,可惜佢唔識閃,唔係會更得意! 牆上中掛咗好多消防帽、鐵鏟等工具。 連放置雜物嘅鐵櫃都完全夾到餐廳嘅風格! 望下另一邊?有士巴拿同齒輪等嘅裝飾。 仲有木梯、消防人員嘅制服等等。 每一個角落都見到店主俾咗好多心機落去! 好啦,等咗咁耐都肚餓啦。呢度嘅Menu選擇唔多,得底面兩版。 Kongirl首先點咗柚子味嘅Cider Rita解下渴先,支汽水倒轉插都幾新奇,當你不斷飲支汽水就會不斷fill。我見每一枱都有點架!(當然唔想飲汽水仲有啤酒揀:P) 之後揀咗個「辛湯海鮮鍋」,Kongirl誠意推介呢個呀!呢個鍋辣辣地好惹味,仲好足料,有青口、蝦、帶子,仲有好多蔬菜同菇類! 最後就到主角「鐵鏟芝士排骨」啦!呢度有半份,兩個人食啱啱好! 職員會等到芝士溶嘅時候,過嚟幫你剪兩舊同幫你捲埋芝士。呢個時候記得望住職員點捲啦!因為Kongirl掛住望住啲喺度沸騰嘅芝士,之後唔知點捲好...... 因為本身舊排骨都炆過,所以好腍身,唔會話好硬扯唔開!加上芝士嘅味道唔會太濃,唔驚搶咗排骨嘅味道。 (作為芝士控嘅Kongirl,無乜味嘅芝士真係唔得...但都有朋友話排骨嘅味道好出) 總結係,芝士排骨真係好滯,要隔好耐先會食第二次。但未試過嘅就可以一試啦! 仲可以順便去埋濕地公園添!(Clikc Link可以直接去到濕地公園遊記) 地址:元朗西菁街9號富盛大廈地下95-100號舖 *非合作,純分享 想知多d 香港有咩好去處同有咩餐廳推介, 就痴實我地女孩像我 Kongirlike me 啦 ~ FB: https://www.facebook.com/kongirlikeme Blog: http://jmc.hksyu.edu/jour395/w15p2/ instagram: kongirlikeme