春天真係一個踏青嘅好季節~天朗氣清,又唔會太熱!Kongirl呢個星期六日,就帶大家入一入天水圍,行一行濕地公園!Let’s Go! 首先,最快捷到濕地公園嘅方法,就係搭西鐵到天水圍站,再轉輕鐵就濕地公園站。輕鐵係一種只係喺元朗、天水圍、屯門遊走嘅交通工具,就好似港島區嘅「叮叮」咁,對唔少港島人嚟講都幾新奇架! 好啦,見到路牌就知就到架啦! 朝住濕地公園進發嘅同時,都可以留意下周圍嘅花花草草。因為天水圍嘅綠化範圍十分大,而且好多花都盛開緊,所以周圍都係景點嚟架! 等Kongirl去買張飛先!濕地公園好抵玩,成人$30,而學生、長者、小童都係半價$15咋! 近門口處有個生態迷宮可以玩,跟住迷宮嘅問題行,一定唔會盪失路! 其實Kongirl未嚟濕地公園之前,一直以為佢只係一個「公園」,但佢真係唔係一個「公園」咁簡單!如果你去海洋公園唔多好機動遊戲,呢度就必定好啱你啦! 點解我話佢唔係「公園」咁簡單?因為佢簡直就係一個海洋生物館。 想睇魚?有! 想睇蛇?有! 想睇鱷魚?都有! 當然唔少得濕地公園長期住客-貝貝! 濕地公園有室內嘅地方,行到熱可以入去涼下冷氣! 呢度會帶俾大家好多環保嘅資訊。究竟動物會點樣被人類利用? 製作一本書需要用到幾多水?行完一圈包你獲益良多! 而且濕地公園有好多小遊戲,等你可以一邊玩一邊吸收知識!當日Kongirl就化身傻豹,同朋友一齊玩遊戲、答問題! 仲有仲有,呢度提供好多望遠鏡俾大家睇雀仔,睇完仲可以試下搵返出嚟添! 荷花靚到好似假嘅咁! 點擊圖片放大 +4 呢度嘅花種類真係太多,幾乎都係盛開咁際!但係唔緊要,全部花都有個牌去介紹呢個品種,同埋花期等資料,而且仲有QR code添! 想睇更多? https://www.youtube.com/watch?v=X2SxbRFRF4A 好啦,其他新奇有趣嘅地方就由大家去發掘啦!希望大家假期玩得開心啦。下次再見,Byebye~:) —————————————————————————————- 想知多d 香港有咩好去處同有咩餐廳推介, 就痴實我地女孩像我 Kongirlike me 啦 ~ FB: https://www.facebook.com/kongirlikeme Blog: http://jmc.hksyu.edu/jour395/w15p2/ instagram: kongirlikeme