老實說其實我都幾鍾意小動物 鍾意去啲郊區少少嘅地方睇動物 例如台灣嘅草泥馬Cafe 奈良嘅鹿 仲有以前去英國嘅時候Host Family嘅農場 韓國嘅動物主題Cafe感覺上比香港多元化 除左係地方大啲 條例同配套都寬鬆啲 香港嘅動物Cafe都係侷限係狗仔喵喵兔仔等較為小型嘅動物 韓國感覺上係動物種類多啲同偏門啲 除左今次去嘅羊羊Cafe外仲有狸貓Cafe(狸貓Cafe可以睇我友人彌生Instagram嘅介紹 @nei4sang1) —————————————————————————————————————————————— 今次去嘅Thanks Nature Cafe係上年去完韓國畢業旅行嘅友人們推介 重點係間Cafe係市中心超級容易去到所以就去啦 間Cafe之所以可以養到羊係因為佢開係B1/F地方大啲同涼啲 行過去本來好熱 但係一落到去就算冇冷氣都好涼爽 太陽只係透過樓梯口透去地下一樓 啱啱照到少少羊羊住嘅地方所以唔會曬到間Cafe熱辣辣 ▲成個感覺好舒服 設計上都好有心思 幾多羊羊擺設 成個Cafe感覺好牧場物語嘅田園風 除左係因為遠離煩囂嘅街道 仲要因為裡面嘅設計氣氛都好牧場Feel 養羊嘅地方、檯燈擺設、籬笆都係淺色木造 感覺好舒服 養羊嘅小牧場喺Cafe出面 唔怕衛生嘅問題由唔驚杯杯碟碟整親羊咩咩 大概係用籬笆圍左一個小範圍比兩隻羊羊住 籬笆附近放左啲凳比食客可以坐喺到發呆睇羊羊 撞到羊羊都係一種緣份 因為暑假嘅時候佢地有可能去左遠處嘅牧場避暑(來自官方Facebook)當我地搵緊路過去果陣見到呢個Post個心即刻離左離 ▲羊羊問號 —————————————————————————————————————————————— 喺到養嘅都係幼羊 等呢班羊仔大個左之後就會送去牧場或者動物園 而Cafe就會黎一批新嘅羊仔 感覺就好似羊仔嘅幼稚園 咁啱今期嘅羊仔都比較靜 好乖乖咁坐喺到食野 好搞笑明明佢地係冇食野入口但係會不停咁係到咀嚼 淨係睇佢哋咀嚼已經好治癒 友人表示睇左幾分鐘已經悶 但係我睇左差唔多十五分鐘 友人就好無奈咁喺Cafe入面等我 點擊圖片放大 +3 ▲ 要幫羊羊影翻張菲林相 但係之前畢業旅行時候嘅友人們表示果陣果批羊羊好活潑一直走黎走去又顏藝 嘛 呢啲嘢都係講緣份 呆呆萌萌先適合翻羊羊嘅性格 難得小牧場都好乾淨整潔冇咩異味 同埋都幾適合小朋友去 冇咩危險性又可以接觸小動物 跟住我手多多去掂下羊羊 啲毛好軟熟好有彈性 頓時心也融化掉了 —————————————————————————————————————————————— 講番Cafe 主要係食Waffle、Toast、仲有韓冰 飲品就有普通Cafe飲品、花茶、沙冰款式都算多同足料 點擊圖片放大 ▲餐牌 我同友人就叫左Quattro Waffle同Honey Pomegranate Tea 因為貪佢個Waffle大同飽肚 同埋有幾款生果Toppings 仲要係即烤 ▲ Honey Pomegranate Tea 蜜糖石榴茶 5ooowon ▲ Quattro Waffle 四式窩夫 12000won 賣相好不錯 水果都幾多下 但係可能影相影耐左Waffle唔係好脆 個人比較鍾意脆同硬少少嘅Waffle 食飽飽就去睇羊羊 又好寫意了 —————————————————————————————————————————————— 間Cafe都算係旺區唔難去同唔難搵 由地鐵站行過去大概10分鐘左右 行大街去都幾安全 仲要食完順便去周圍行下街 去到一堆矮平房 左手邊最後一棟就係啦 係G/F就有個牌寫著Thanks Nature Cafe 行樓梯落一層就係 —————————————————————————————————————————————— 店鋪地址: 1)Thanks Nature Cafe 地址:마포구 서교동 486 서교푸르지오상가 B121 121-842 Seoul, South Korea 電話:+82 2-335-7470 營業時間:11:00-22:00 交通方法:弘大站 8號出口 ——————————————————————————————————————————————