有些事當時(現在)不做,一輩子也不會做… 想當年,因為真係好奈她奈之前,在下第一次和當年仍叫小笨的友人樹懶,一同衝出亞洲,去左我朝思暮想既國度 – 澳洲。也許當時年紀少,因為我是參加旅行團前往的,換在今時今日,如果要我跟團去一些自己能控制到的地方,我情願不去!(有點大口氣…) 去得澳洲,就梗係為左好探下我最鍾意既動物樹熊啦!探親之餘,跟旅行團真係好鬼死多Option,我們毫不猶豫的選了全餐:剪羊毛Show、黃帝蟹鮑魚餐、天然橋國家公園觀星夜探螢火蟲和熱氣球升空,可是全餐之外,原來還有很多很多的Side Menu,最終還是放棄了四驅車,增遊了悉尼水族館。 最近在台南旅行時,參觀了高雄的熱氣球嘉年華,雖然沒有再次升空,但不時令在下和友人想起之前在澳洲凱茵斯Cairns乘坐熱氣球的片段,為此特意回家翻出當年的遊記(是40頁的手工版本),透過科技(Scanner一個,嘻嘻…),把原文展現各位眼前,去片 ~~~ Balloon Adventure 14格 點擊圖片放大 +3 後記 晨咁早三點幾鐘,Koala同小笨又要摸黑出發,出發黎做乜o野?!咪係走到去荒山野嶺度食西北風囉!仲要企足幾個鐘,之後仲要體力勞動,問你死未?咁究竟咁辛苦晨早起來做乜鬼先得o架?咪係為o左玩呢個熱氣球囉…一早醒來,第一時間就要梳洗好,再以極速走到Lobby匯合,跟住就坐車走到野外山上,到達後,天仍然漆黑一片,頭腦仍未清醒,但一眾工作人員的工作已進行得如火如荼,沒有太陽的時份,顯得寒冷非常。 但係對於我Koala同小笨玩o既熱情,當然勝過一切啦!何況係寒冷。之不過,一路睇住個火,一路燃燒,心情都緊張起來,究竟飛o左上天會有咩感覺呢?不消多分鐘,我o地”上籃”啦!仲要係當日第一個升空o既氣球,真係好開心,加上氣球一邊上升,日出o既過程盡在眼內,在這短短的30分鐘內,相影過不少,澳洲的草原也看過不少,不過好玩o既時光永遠係最容易消逝,好快我o地就降落啦,但旅程仲未完o架,餘下落黎,我o地一行16人,仲完去追氣球呀! 為乜要追氣球咁…辛苦呀?如果有睇過5月中永記個澳洲o既旅遊特輯o既話,都會知道稍後有咩搞作啦!就係收拾巨型氣球啦!!! 咪睇電視入面阿原子鏸同何嘉莉好似收拾得好容易呀,其實都不知幾體力勞動呀,但係收拾起來又幾好玩wor,搞掂之後,緊係要影番張大合照啦!Koala依稀記得相中入面包含o左多個國籍o既朋友,好似有我o地香港、日本、澳洲呀同歐美等等…(但係好遺憾,主辦單位部相機出現問題,故未能擁有呢張珍貴照片!) 然後,我o地就去到一個類似郊野公園o既地方食早餐啦!唔知係咪經過長時間運動之後,胃口都大o左,簡直係唔理係乜,總之擺得入口就食啦!結果咪出事囉!~食o左D羊肉腸呀!! 寫在2001的文字 近年屢見熱氣球出現事故,年初更有港人旅行團在埃及熱氣球意外失去性命,看似沒有甚麼難度的熱氣球活動,原來也可以是非常危險的,慶幸在下在年少之時已有機會坐上熱氣球升空,總算體驗過、興奮過!現在人大了,顧慮也多了,每作出一個決定,都要顧及身邊的人,瀟瀟灑灑的上機,現在並不合用。 看著自己十多年前的文字,稚氣十足,很多口語化的字,也運用了很多的標點符號,交筆有沒有進步?只希望沒有退步,只是長大了,文字都是經過思考而寫,而再不是衝口而出… 寫在2013的文字 完成這次Balloon Adventure的飛行後,每位參加者都會得到這張現在看來好Old School的證書,正好紀念這次難忘的回憶,因為…可能…或者…以後都未必再有機會(膽量)去乘坐熱氣球了…