美食推介《The Carrot Tree》咁我喺La Paz第一餐食嘅係當地評分都比較高嘅餐廳 - The Carrot Tree The Carrot 係The Witches' Market隔離,位置都算方便嚴格嚟講佢其實係一間西式cafe有意粉、三文治、鬆餅、pizza、 沙律價錢上喺當地嚟講都唔算平,平均每人食得飽都可能要Bs 50-60 (部分Menu,未盡錄)周圍嘅環境望落都係好舒服座位夠大、空間又夠寬敞最緊要在場嘅職員都係操流利英文尤其有一兩個男侍應好靚仔,好似平時啲平面廣告model咁 我食嗰陣老闆都喺度佢見到我係亞洲人,即刻走過嚟同我傾計原來老闆係美國人,因為鍾意寫意嘅生活所以嚟咗玻利維亞(但唔係美國仲好住咩......)講返我食咩先啦,我就叫咗一個雜果Pancake配蜂蜜醬我起初諗住係好似麥當勞熱香餅咁嘅size點知嚟到嗰陣發現好大份,仲要係兩層 望落水果都有蜜桃、香蕉、 士多啤梨、菠蘿個pancake唔單止面頭舖滿切咗粒嘅水果中間嗰層亦都鋪滿曬水果,多到爆水果係新鮮即刻切,唔係用罐頭或者冰封咗好耐 兩層Pancake煎得好香,烹調過程拿捏得恰到好處外皮少少脆脆地,但係裏面嘅部分又好鬆軟形成咗好強烈嘅口感對比 而醬汁方面個蜂蜜醬真係完全係蜂蜜,甜而不膩唔係平時普通假蜂蜜死甜,配合埋個pancake真係好夾普通中菜行下條大街都好多人不過車更多,而且廢氣瀰漫 間運動用品舖都幾大間 我住嘅附近其實都幾多餐廳、小食店例如有炸雞、薯條、漢堡包、三文治價錢都係非常合理 Burgar King都有,而且價錢平過係秘魯食M記好多 不過嗰刻我真係好想食碗熱辣辣嘅湯麵最起碼係啲濕立立嘅嘢所以我就揀咗Burgar King附近有間賣中餐嘅食店 無論鋪面、餐廳名定係入面職員都完全冇任何中國色彩唯獨係得餐牌入面嘅食物係中餐 唔係講笑,其實幾抵食,佢啲飯嘅份量都多我就叫咗一碗紅燒牛肉麵同埋8隻餃子 (外賣)另外買滿 Bs 25就會送一杯檸檬水 水餃方面,外皮非常厚,裏面個肉餡超級紮實,真係會掟死人嗰種而且味道都一般紅燒牛肉麵方面我反而覺得ok湯底好油、夠濃、有辣味、有花椒八角味牛肉的分量都多嘅不過麵條方面淋咗少少,都可能係因為我外賣浸咗幾分鐘但呢碗我覺得食得過,起碼唔會覺得難食,可解心中之苦