26/8 星期六 呢一日老港孩Charles覺得悶到喊,所以就相約W先生外出 (W先生係小弟朋友,都係之前峴港旅行既遊伴) 我突然好想食點心 但鮮去酒樓既我實在諗唔到去邊食好,所以W先生就推薦左位於是旺角既老點點心竹筒飯,話係行新派點心路綫 其實平時行旺角我都會見到呢一間點心鋪,人流都多,成日都要排隊 諗住應該質素唔差,所以即管一試! 老點點心竹筒飯係麥花臣球場同旺角東天橋中間 位置上並非坐落係最旺地點 從旺角站E2出口行去大概係5-10分鐘,旺角東站行去都係5-10分鐘 我地比較好彩,等左一陣就可以入座 而且排隊之際,店家都會提供點心紙等大家先選擇點心,一入座就可以遞張紙 比張點心紙大家望望 從價錢上望,作爲新派點心鋪就唔算好貴,當然點都會貴過一般茶樓啦 大部分點心都係HKD15-30呢個range 而從食物選擇上睇,如果你係4個人左右都算夠。但如果人再多d,無論分量上定選擇上我個人都係感覺不足。當然,呢個都係基於新派點心鋪頭仔,始終發揮空間都係有一定局限。 我地兩個人叫左5樣點心 1. 醬爆芝心炸蝦丸($28) (☆☆☆☆) 炸蝦丸其實係我一樣好中意既點心,甚至可以作爲傳統圍菜菜式 呢度炸蝦丸首先從擺設上已經係唔會比人一種下欄野既感覺 每粒炸蝦丸底下都會有一兩小塊常見沙律菜墊底,中和返個油份 蝦丸炸得好好,油份逼曬出去,所以食落唔會有過油感 而且外層酥脆,内裏蝦漿擬固後卻好彈牙,中間又有唔濃既芝心陪襯 整個口感係先脆後爽再暖 但有個比較小瑕疵係面頭上既紫菜每一粒都分佈唔平均,如果想賣相好d就必須要多注意 2. 碧綠帶子腸($28) (☆☆) 本身見到碧綠帶子腸呢個名我心裏面都估到應該係帶子入面擺d菜入去 果然不出我所料,入面係帶子肉同一小片小棠菜 雖然係腸粉,但其實有別於我地一般係酒樓食到既腸粉 呢度就好似用餃子既形式,用蒸好既腸粉皮包住原粒帶子同一小片小棠菜 帶子部分係ok,處理得好彈牙同嫩,呢部分挽回最多分 但老實講,如果店家加一小片菜純粹係想營造碧綠效果,咁佢係成功既。但對於整舊腸粉從味道上我個人感覺並無提升一個層次。本身Size細,加上又唔係特別甜,所以並無幫助到增添任何吊味,反而有少少不明其意。 而另外因爲要逐舊逐舊包,所以腸粉皮不能太薄,因此令腸粉皮比較厚,係我自己最唔中意既部分。 3. 慼風斑蘭馬拉糕 ($22) (☆☆☆) 我真係好中意食馬拉糕,平時經過唐記都一定買番舊、去酒樓第一樣就會tick 而呢度既馬拉糕係落左斑蘭汁,所以會呈現綠色 但老實個句,實在無斑蘭既味道......有少少掛羊頭賣狗肉既感覺 另外分量都比較細......個一小塊我一啖就塞曬入口 但好既地方就係好鬆軟,唔會太多空氣/太實 4. 師傅冬筍鮮蝦餃 (19) (☆☆☆☆) 蝦餃相對表現平穩,好食但唔出彩 皮薄,入面油份適中,有原隻彈牙蝦,不過冬筍部分就未感覺到 係一份ok既蝦餃 5. 咸香黑魚子蒸燒賣 ($19) (☆☆☆☆) 問題其實同炸蝦球一樣,都係外觀出問題。 黑魚子分佈完全不平均,明明黑魚子應該係主打 而且就算我食多黑魚子個舊,都無明顯咸香味 但燒賣本身都大粒,加上係鮮蝦燒賣,粉少料多 咬落去你會覺得好實在,味道得宜 最後Total埋單係130蚊左右,包每人4蚊茶錢 我自己或許未必再黎,從味道定價錢都未吸引到我專程再去 但公平講句味道真心ok,你會有懷舊味道之餘又有新鮮感 係屬於有質素既新派點心店,難怪好多遊客專程前來 不過如果店家多加注意端出黎食物賣相是否接近,如果爭得太明顯真係會令食客覺得奇怪