19/5 星期四 京都 今日要搬地方啦..... 我地拎住d行李由美國村一直行到松屋町。 由於路程都成10-15分鐘,所以我地呢一日早左起身,係便利店咬左個飯糰就出發。 雖然轉屋係有少少麻煩,不過當住完第二間屋之後就覺得好值得! 新屋位于松屋町站,衹需步行2-3分鐘就到,行去心齋橋都衹不過係10分鐘,沿途又有玉出超級市場! 我真心推薦呢間屋比兩/三人嘅組合,因爲呢間屋超級企理,所有野都好乾淨。 雖然size無上一間咁大,但整體感覺呢個絕對比上一家好。 從洗手間方面,呢間所選擇嘅馬桶比上一家先進d。 厨房同瞓教嘅地方係分開,更似一個屋企。 雖然整體面積係上一家大d,但呢間比我感覺係高級d。 如果我下次再去大阪,一定首選呢間。 擺好行李之後,我地就立刻去搭地下鐵前往淀屋橋,再轉乘京阪電鐵前往京都。 因爲我買嘅係京阪電鐵2日Pass,所以我今日都係任搭架! 我地第一個目的地係每年都係日本觀光景點前三位嘅伏見稻荷神社。 由淀屋橋出發乘搭特急列車去到丹波橋,再轉普通列車去到伏見稻荷站。 伏見稻荷站其實好有特色,全站設計都係紅色,同伏見稻荷神社好match。不過大家要小心影相喇..... 沿途都見到好多小攤檔,好似慶典咁。有d賣緊串燒、雪糕、廣島燒、水果etc.... 呢d感覺已經好耐無浮現過。 香港基本上每年年宵先會出現呢d場面,但呢度一年365日都會出現,而且兩旁大樹、後方鳥居,更添氣氛。 而且游客好多,外國游客仲佔左好大比例添。 唉,大家都知我大食架啦,所以我即刻買左份廣島燒(500Yen)。 其實味道呢....好普通啦,主要食個風味姐。 但500Yen又好大份,我同朋友兩個人share。 裏面有好多菜、有少少炒麵、好少好少嘅紅姜,上面茶滿曬醬,解餓一流。 其實由伏見稻荷站行去伏見稻荷神社係5分鐘左右,不過沿途真係太多攤檔,令人目不暇給,所以我地都放慢腳步。 大概花左10分鐘多d,我地先行到神社。 伏見稻荷神社主要顔色爲紅色,無論大小神社、鳥居等都係紅/橙紅色。成件事富有特色,我都趕住要去打卡啦。 不過呢,入去寺廟之前最好都淨一淨身啦.......(淨身!?唔L係挂。入寺廟都要切_?) 其實係洗一洗手嘅意思! 好多寺廟、神社入去之前都會見到有個位係洗手池,日本叫做手水舍。 參拜前,必須先洗淨雙手和漱口,代表淨身,以顯示對神明的尊敬。 但是洗手可不是隨便將手放入水中洗洗就好,重視神明嘅日本人,發展出一套洗手嘅「繁文縟節」。 1.先用右手攞起勺子舀水洗左手 2.再用左手拎住勺子,用淨番嘅水洗右手 3.用右手拎番住勺子,將水倒係左手然後灌入口,用作漱口 4.而最後垂直番個勺子,將淨番嘅水流番出黎,淨潔番勺子 必須特別注意,上述步驟必須使用「同一勺水」!! 伏見稻荷神社之所以吸引人嘅地方在於鳥居。 鳥居其實就係呢d紅色兩碌柱,好似度門咁。鳥居一個接一個,相連一齊,形成一條道路,令到呢度成爲打卡熱點。 教大家小小打卡技巧。當你一開始步入鳥居路之前,會分開兩邊。 一邊係上,另一邊係落。 上個邊永遠多人到嘔,所以好難影相。 我建議大家可以係落個邊影,因爲人真係少好多。 你睇我後面一個人都無,輕鬆影相無難度。 沿路而上其實都係一堆鳥居砌成嘅道路,令到本身空虛嘅樹林增添一股恬靜之氣。 由於時間同體力關係,我地僅僅行到熊鷹社就折返。 如果有時間嘅你不妨多行兩步,聽講山上面d景色都好靚。 不過都小心d....因爲聽聞山頭都有過靈異事件發生.....信不信由你啦 離開伏見稻荷神社後,繼續乘搭京阪電鐵前往衹園四條站,準備去另外一個著名神社--八坂神社。 從衹園四條站行去八坂神社其實好快,10分鐘内就到,沿途好多抹茶店,大家有興趣可以試下。 不過呢,其實八坂神社有d悶,個人感覺伏見稻荷神社其實觀賞度更高,所以行左一陣就走左,然後求其行左入間餐廳,食左個我都費事提及嘅飯餐就算。 因爲人懶,所以就決定搭巴士直接去清水寺,費事行。 巴士5分鐘左右就車到我地去清水寺山腳。 因爲天氣炎熱,所以我地都決定慢慢行就算,費事出曬汗。 清水寺位于山上面,行上去都要一段時間,而且係斜路,所以都好辛苦。 沿途見到好多著和服嘅......港女同内地人..... 靚唔靚就見仁見智啦==' 不過的確游客滿滿。 而且係呢度睇風景真係一流。 由於居高臨下,所以俯視成個京都,一切景色一覽無遺。 之後比埋錢入到去,四周觀賞景色,好迷人。 不過我相信如果係冬天、春天同秋天黎一定更具意思! 因爲我5月去,見到嘅淨係得綠色同陽光。 反而如果櫻花季節黎,大家會見到花開茂盛,好多唔同顔色。而冬天黎,全景會變成白色,靚到喊! 所以大家唔好怕辛苦,一定要黎啊!點擊圖片放大 沿途落山,小路兩旁其實都擺滿好多商品店供大家買手信。 而且日本值得一贊嘅係,好多手信店都唔會坐地起價,價錢其實都好公道、好大衆化。 係香港,如果係旅游名勝買支水分分鐘要成20蚊,就算連便利店都會貴d。 但係日本,就算係呢d臨近名勝嘅手心店、小食店價錢同出面都幾乎無異。 可能講緊500Yen 8張明信片,100-150Yen一支野飲等等。 而且大部分店鋪都提供試食,絕不吝嗇。 而且店員係發自内心招呼你,離遠都見到挂住笑容。 而非好似部分香港個d離遠見到就西口西面,一行到去就一堆虛僞笑容。 伴隨住離開清水寺而正式結束呢次京都之旅。 好有體會在於京都係一個好有特色嘅地方,傳統與現代互相結合。 一條河將現代化同一堆寺廟分隔,卻又有種相連的感覺,令我留下深刻嘅印象。 有少少遺憾無去到銀閣寺,亦希望有一日可以係櫻花盛開嘅季節光臨嵐山,仲要好好係河源町行下街先得! 回到大阪 天開始黑,我地都開始返回大阪,去心齋橋覓食 本身想去四天王,但發現排曬長龍。 因爲真係好餓,所以唯有放棄四天王,食多次神座拉麵啦。 味道上其實同上次食都係一樣,所以都唔再多講。反而我想講下食完飯嘅行程。 由於呢一晚係第一次認真行心齋橋,之前幾日都一直係其他地方。 今日第一次黎到心齋橋行街,先覺得自己真正黎左大阪。 人多到離曬譜....好恐怖。 由於我地食完野都成8點半,好多店鋪都開始閂門。 我地先發現原來日本所有鋪頭都好早收,所以更加令我地之後幾日更加堅定早起身! 大家都要記住,好似心齋橋裏面ABC mart/Nike之類連鎖店同好多小食店都係9點半前就閂門,所以大家都要早d行街。 見個陣好飽,所以無買到Pablo cheese cake...估唔到到離開大阪之前都無食到,有d sad。不過好彩試左另一款小食,MaiSon de gigi嘅Waffle。 我叫左原味(150Yen),確實無咩甜味@@所以建議大家可以試下其他味。 然後去左藥妝店掃左7000Yen左右嘅藥同生活用品啦。 我掃左訪日必買嘅休足、維他命C丸、曼秀倫敦、娥羅納英、口氣清新噴霧、眼藥水、止癢膏etc...仲有好多好多。 建議大家出發前search定要買d咩。 因爲日本好多藥其實好好用,好似休足、曼秀倫敦、娥羅納英平過香港好多,喇叭牌、化妝品quality都好好。 另外,臨近H&M旗艦店最大型個堆藥妝店一定會貴,所以大家格下價啦。一般去到心齋橋-本町呢段藥妝店平均比較平,但可能無咁齊。個人建議可以行俠南船場個一節都可以。 結果好滿足咁買左好多藥返屋企....不過返屋企之前當然都係要去玉出掃下貨xd