獨遊15日秘魯、玻利維亞(43) : Astrid y Gastón – 2019年全球最佳餐廳第39位

2019全球最佳餐廳第39位 <Astrid y Gastón>

食唔到Central就唯有食Astrid y Gastón彌補下
佢都連續幾年位居頭40名
最好都book咗枱先去啦

同樣地Astrid y Gastón都有個Tasting menu (S/.495)
不過我都係鍾意自己叫餸多啲

Click下面條link就有個餐牌睇,價錢都有㗎
https://drive.google.com/file/d/0B_6TJ-fY0hkjdnpUQzBfYXFKWnRHWlN4MUxBcF9tMnVWc2dN/view?usp=sharing

坐的士去到餐廳門口
一落車見到餐廳門面…嘩,好高級
爭啲以為自己去錯地方

入到餐廳即刻勁好招呼
話見到我booking個名係Asian,估我係黎旅行
所以留咗張最接近廚房嘅枱畀我

又真係幾好喎,可以咁近距離望住廚師煮嘢

成個餐廳嘅格局對比Maido,我覺得呢度high-class少少
而且燈光少少暗,更加有一種貴氣

我問過有冇dress code,佢話冇
然後我再同樣地發現自己係著得最hea嗰個
我唔飲酒,好樣衰咁叫汽水飲

我total叫咗 2個前菜 + 2個主菜
因為我想係個肚仲食得落嘢嘅情況下盡量試多啲嘢

第一道前菜 Pekking Cuy
係呢度一個signature appetizer,亦都係我最想試嘅菜式

佢係用咗中式片皮鴨嘅方法去呈現呢道餸,舊肉唔係你哋諗嘅乳豬
而係秘魯名物,好多人嚟到秘魯都會食嘅……天竺鼠
喺其他地方食可能會係原隻上,我自己就唔敢喇,所以就喺度一試天竺鼠嘅滋味
外皮非常酥脆,好過唔少本地酒樓嘅乳豬
肉質比較實淨,有啲似燒鵝燒鴨嗰種
如果唔講,真係冇人會估到係天竺鼠

天竺鼠上擺咗啲中式嘅醃蘿蔔,少少酸酸地都幾開胃
不過塊皮就稍為厚咗啲,中式片皮鴨嘅面皮就好食好多啦
呢舊乳天竺鼠整體唔錯,幾特別,又了咗一個心願

第二道前菜 Nikkei Dumpling
店員推薦我食呢一個,話一個日式牛肉芫荽餃子配粟米醬
擺盤普通,餃子望落有啲似韓國餃子個種包法
底下鋪咗一層橙黃色嘅粟米醬同紅色嘅甜辣醬

食落個皮都幾薄,尤其個對摺位做得好好
入面嘅餡料都多汁
甜辣醬好惹味,令到呢碟餃子有啲似唔辣無油嘅紅油抄手
不過甜辣醬個味太出,蓋過咗粟米醬嘅甜味,要齋食粟米醬先感覺到
我覺得唔洗特登叫,對亞洲人黎講甚爲普通

 

第一道主菜 Tuna Loin Lima-bermeo
佢係一道煎吞拿魚配上甘筍、紅薯 同一種叫做olluco根莖植物
面頭就淋上用魚頭同海鮮淆製嘅醬汁

賣相還好,舊魚肉大咗啲、厚左啲
個醬汁少少鹹,唔係好食得出係用海鮮淆製
其他配菜食落都係一般中級餐廳水準

舊吞拿魚肉就真係要讚一讚
佢嚿魚肉咁大嚿,係好難煎,好容易過熟或者入面唔夠熟
但幫我切開嚟睇,中間嘅魚肉已經係啱啱好,並且仲呈現好靚嘅粉色
外皮就煎到少少焦色,望落係好吸引
食落魚肉仲係好嫩滑,完全唔老,證明佢封煎嘅技術掌握得唔錯
調味方面就緊緊落咗少少胡椒同鹽
基本上都係靠本身魚肉嘅鮮味同醬汁嘅味道

我個人認為呢度菜唔錯
如果喺香港有體面嘅餐廳食,最起碼三舊水都不為過

第二道主菜 Crispy Pork Belly
我簡直係痴咗線先會叫呢一碟嘢
我當刻完全冇諗到佢同廣東嘅燒肉係咁如此相似
碟餸送到過嚟,完全就係兩嚿燒肉擺喺我面前

下面紅色嗰Pat係由紅色薯仔整成嘅
我估計佢係想用呢種Creamy口感中和返肉嘅紮實感

仔細望一望嚿燒肉肥瘦層次好分明,整體口感係好嘅
一層肥一層瘦,簡直就係邪惡
尤其瘦嘅部份都唔鞋,肥嘅部份就更加唔使講
塊脆皮唔算好厚,呈現金黃色,亦都新鮮出爐夠脆

讚嘅部分講完,就要講佢缺點啦
首先佢提供畀我嘅工具係一把叉同切肉刀
平時食個燒肉嘅人都知燒肉塊皮係好難切,燒肉佬都係用斬嘅形式處理
呢塊皮都係一樣,切極都切唔到,慢慢鋸都唔知要個幾多個世紀
我喺呢個檔次嘅餐廳,你唔係諗住要我斬嚿燒肉啊嘛???定expect食客係將肉同皮分開食??

除咗餐具嘅問題,好難處理嚿燒肉最大嘅原因就係嚿燒肉太大喇
如果佢可以預先幫人處理好,例如一分為二、井字形方式切 以東坡肉形式呈現
對食客嚟講係方便好多
因為佢真係唔似牛扒咁容易切開

除此之外,以下係我自己感覺
食兩大嚿燒肉其實係好滯,尤其入面又有肥膏、又有一大舊瘦肉
我食咗一嚿已經唔想再食落去,一來難切,二來好滯

比個甜品menu大家望下

我對呢間餐廳嘅感覺係環境好舒服,而且具備一定檔次
食物質素唔差,價錢都唔算好貴
前菜 + 主菜 + 甜品 + 飲品,大概都係S/.200内

但係食物嘅呈現、處理嘅手法、味道嘅配搭
我認為 Maido 都係 Astrid y Gastón 之上
所以我喺食Maido嘅菜式嗰陣,都帶到比我一定嘅衝擊到大好多,感覺比較强烈
雖然一個係鱈魚一個係吞拿魚,但確實我都而家都仲對Maido鱈魚記憶猶新
但一食完吞拿魚就冇曬記憶

當然我覺得好味與否係好主觀
可能都有啲人鍾意大大啖食大大嚿肉、鍾意食實淨嘅魚多過嫩滑無乜咬口嘅魚
我仍然會評價呢間餐廳係一間質素高嘅餐廳,四平八穩冇乜問題
大家一試都無妨,可能佢個Tasting Menu係好正呢

但不得不說,佢哋嘅服務態度真係好到爆
會定期問我有冇咩需要、主動加水
知我下一站要去搭的士機場,喺我埋單嗰刻好自動幫我call埋的士
我拎返行李正想麻煩佢哋幫我call,佢哋同我講五分鐘後就有的士,我係O咗嘴
落樓梯又幫我搬行李

This entry was posted in 南美菜, 秘魯 and tagged . Bookmark the permalink.