東京豐州市場、不復當年的神樂壽司

<豐州市場>

對上一次去東京係上年嘅事,仲記得係築地場內市場拆卸之前
所以一直都未有幸參觀新建嘅豐洲市場
唔少人都介紹過,但我都係決定親身去望一次個環境

叫得做豐洲市場,呢個新嘅”築地場內市場”就梗係喺豐洲啦
要去嘅朋友就記得搭Metro去木場站搭百合海鷗線去到市場前站
當然你鍾意嘅可以喺新橋站或者汐留站上車都得

從位置上我覺得係唔方便咗
比以前附近有幾個地下鐵站包圍,而家就只係得一條線去到
車費都貴埋,旅客常用嘅pass冇一款係包到
尤其百合海鷗線一向都出名貴

豐洲市場同以前嘅築地場外市場最唔同嘅係
唔係將所有嘅擺曬喺同一個area
而係分開咗幾棟buildings,每棟嘢配備幾間餐廳
就好似以前大排檔係幾間嘢同一屋簷下,而家就變咗幾個冬菇亭

係市場站一出分左右兩邊天橋
行邊一邊都冇所謂,因為d天橋其實都係互通,爭咗個幾步路啫
右邊:水產仲介批發賣場樓棟 (水産仲卸売場棟)、屋頂綠化廣場 (屋上緑化広場)
左邊:蔬樓棟 (青果棟)、管理樓棟 (管理施設棟)、水產批發賣場樓棟 (水産卸売場棟)

以前大家慕名排隊嘅壽司店唔再係擺曬喺同一個位置
而係分散喺三棟大廈
要清晨去排隊嘅人就要試前做足準備功夫

咁等我逐棟逐棟介紹啦

先介紹水產仲介批發賣場樓棟 (水産仲卸売場棟)
佢分為前半部分 (3/F 餐廳) 同後半部分 (4/F 商店街)

包括壽司大、鰭文、大江戶等以往都比較出名嘅鋪頭都係呢度
而且壽司大門口仲擺咗幾張凳畀大家排隊可以坐下

我唔知自己有冇記錯
但我依稀記得一年前的築地市場,大部分舖頭食個Omakase都可以4000Yen或以内搞掂
宜家搬到新嘅地方,果然價格上都有一個新嘅展示

行返出去再向前行就係通往商店街嘅入口

條通道貼曬唔同品種嘅魚,佢哋嘅漢字、日文同讀音

而且從窗口可以望到樓下仲介批發賣場
不過我成十一點先去到就梗係冇嘢睇啦

搭扶手電梯上四樓會見到有商店街
嗰度賣唔少嘅乾濕貨,如漬物、厨具用品、食材等等
而且條通道又闊落又乾淨,同以前嘅舊環境截然不同

經過天橋過去對面管理樓棟
喺正水產仲介批發賣場樓棟 (水産仲卸売場棟)對面

一行完天橋入去個門口就會見到成條美食街
例如八千家、神樂壽司等就係呢度駐札
實不相瞞,餐廳嘅吸引力確實係低過對面嗰棟

一路向入面行就會去到水產批發賣場樓棟 (水産卸売場棟)

大家可以係樓上俯視下面嗰層嘅批發賣

亦都會有塊牌喺度簡介畀大家聽每一日嘅流程

慢慢行過去市場前站隔離嘅果蔬樓棟 (青果棟)

我相信大家靠名都應該估到呢邊主要係負責做蔬果販賣/批發

所有嘢好似都排列得好整齊
通道已經畫好曬位、有曬名牌
做事井井有條確實係日本人值得稱讚嘅地方

另外呢邊係通道嘅牆身貼滿曬築地市場嘅歷史
又舊至新咁樣排列
感覺各位遊客可以一路行一路了解多啲歷史

咦!? 點解我冇講另一間排曬長龍嘅大和壽司個位置???
其實佢就係果蔬樓棟 (青果棟)嘅地下

所以大家會見到豐洲市場將唔同範疇嘅嘢打散放置
食肆方面亦都散落喺唔同地方
好難再好似以前咁見到壽司大多人就即刻去隔離排大和壽司

今次第一次去豐洲市場畀我感覺係所有嘢都好新穎
見到建築物係好現代化、顏色嘅選取有一種新派嘅感覺
裏面嘅design、佈局非常有條理

但老實講,我都係鍾意以前舊嘅築地場內市場
從前嘅築地場內市場個環境係好有傳統日本嘅味道,所有嘢嚟得好自然
真係一睇就知係好大規模嘅魚市場
但而家呢個豐洲市場雖然好用心去裝飾,但畀我感覺卻似一個博物館多啲
冇咗嗰種近距離接觸、親切嘅感覺
反而有一種刻意展示自己先進嘅一面,失去咗嗰種樸素感

不過好多嘢都冇辦法
為咗配合都内嘅發展,好多嘢都要被迫犧牲


<神樂壽司>

一場嚟到梗係要喺度食下嘢先走啦

出名嗰幾間已經截咗龍 / 大排長龍
咁我就求其揀咗間都算老字號嘅神樂壽司

神樂壽司我記得佢一直嘅評價都係不溫不火
我諗應該都唔會太差嘅
咁我就叫咗個第二貴 Omakase (3240Yen)

佢首先送咗好大碗麵豉湯
真係大過平時人哋丼飯隻碗
而且入面好多蔥花、有少少蟹肉,用嘅係白味噌
都幾好飲,味道幾清甜又唔會過鹹

然後就送咗份壽司嚟
Total 11件手握壽司、1件玉子燒

我望到魚生嘅質素,真係白眼都反到上天
色澤比較暗淡、感覺好似好乾冇乜油份
生蝦肉質已經完全唔堅挺,好似融緊咁軟淋淋
無論係赤身、中拖羅定大拖羅都居然可以有筋, 大拖羅仲要咬囉油份都唔夠多
其他魚都只可以話係普通
海膽同三文魚子算正常,前者仲食到啲鮮甜味,後者有啲啲鮮甜有啲啲鹹香

我記得以前喺築地場內市場佢都算叫做屹立不倒
冇理由會差到咁
我介紹過嘅迴轉壽司店真係求其一間都好過佢

有無後悔無去排大和?
傻咗咩,排咗大和就真係後悔啦
我第一次去築地市場排左5.5Hr 壽司大
質素雖然ok,但完全唔值得我排咁耐
我成日都同朋友講寧願畀多少少錢去食個質數再高少少、又唔使等位嘅舖頭仲好
(而我夜晚個餐係誠意推介)

This entry was posted in 日本 and tagged . Bookmark the permalink.