獨遊4日靜岡縣+2日東京之旅(13):前往河口湖必去景點 – 忍野八海

23/5
忍野八海 — 新倉富士浅間神社 — 河口湖 — (御殿場Outlet)
忍野八海 — 河口湖 — 三保松原

呢一日其實係我最後悔一日
因爲當初plan行程個陣我係河口湖同寸又峽之間抉擇左好耐
加上我自己其實已經去過河口湖(當時又係落雨乜都無)
最後我都係抵擋唔住富士山誘惑,選擇左再次去河口湖睇富士山

另外由於今日天氣都ok
所以上一晚重plan行程個陣決定再去三保松原,而cancel左新倉富士浅間神社
但我完左呢一晚行程其實都真係好後悔

既然酒店包早餐,師奶仔當然唔好嘥
有蛋捲、沙律、生果、腸仔、肉丸等
而且仲有咖喱飯、麵豉湯同果汁

食完早餐就再次出發去御殿場站


《忍野八海》

今次就係藍色箭嘴Mr. Fuji個邊落,去二號巴士站等車

有時你會見到呢款寫住特急巴士
可以由御殿場站直接去富士急樂園同河口湖站
不過就要另外比座位費

搭左接近成個鐘先到忍野八海
係前往忍野八海小徑上都有好多小食檔

忍野八海顧名思義有8海(8個池)
其中7個池都係非常靠近,唯獨出口池係另外一邊比較遠
另外7池當中底無池係要比300円先可以睇,我無比到
所以我只係去左6個池

另外忍野八海係一個非常熱門睇富士山嘅好地方
但可惜呢一日雖然天晴,但就有雲遮住

我見到第一個池就叫涌池
係忍野八海中最具代表性
可以欣賞到大葉藻係珪藻土上搖曳嘅姿態

跟住就係天色許可下可以顯示富士山倒影嘅鏡池

再落去就係因同昌蒲有關嘅美麗傳説而命名嘅菖蒲池

返番轉頭去濁池
相傳呢個池好耐以前個地主因爲拒絕行乞者討水,而令池水變得渾濁
而確實幾唔靚下……

行入少少就會見到銚子池
好似話如果向呢個池倒入酒就會形成銚子形狀
而且d人話對住池良緣祈願好靈

行到比較遠就會見到御釜池
雖然池好細,但湧水量非常豐富

望左6個池,但我覺得最靚都係無名無分嘅中池
姐係負責賣紀念品門前個中央池
絕對係一個打卡聖地

而且大大個日本名水百選地棟係度,好似好巴炮
但實際上就同我之前去實而不華嘅源兵衛川一樣

中池中間有個圓圈位,水非常清澈
連雲倒影都可以清晰顯示

另外行去銚子池同御釜池個條綠林小徑都好舒服

仲有呢個有個位比你感受下富士山雪水
而且話唔可以接觸水超過30秒,會斷手指

行完一圈就離開忍野八海
前往河口湖

This entry was posted in 日本 and tagged . Bookmark the permalink.